Kórar syngja í Hörpu 22. febrúar fyrir friðinn

Í þekktu ljóði eftir skáldið Jónas Svafár segir: „vinna vélbyssur að vélritun / á sögu mannsins“. Það er ekki orðum aukið að alltof langir kaflar í sögu mannkyns hafi verið skrifaðir með blóði. Friðarhugsjónin, draumurinn um að mennirnir geti lifað í sátt og útkljáð deilumál sín með orðum í stað þess að láta vopnin tala, hefur löngum átt erfitt uppdráttar.

Þrátt fyrir aukna menntun og þá upplýsingu sem samtíð okkar er mótuð af, berast heilu þjóðirnar enn á banaspjótum, vígamenn ganga berserksgang og saklaust fólk er aflífað með hroðalegum hætti; fólk sem í raun dreymir ekki um annað en að geta ræktað garðinn sinn í sátt við bæði guð og menn. Það er þetta fólk sem Ari Jósefsson orti um í ljóðinu „Stríð“:

Undarlegir eru menn

sem ráða fyrir þjóðum

Þeir berjast fyrir föðurland

eða fyrir hugsjón

og drepa okkur sem eigum

ekkert föðurland nema jörðina

enga hugsjón nema lífið

Þetta er einmitt lóðið. Flestir eiga þá hugsjón eina að mega lifa í friði; og hvað sem líður öllum landamærum þessa heims, þá er jörðin þegar upp er staðið sameiginlegt föðurland okkar allra. Manndráp og styrjaldir eru smánarblettir á sögu mannkynsins. Það er siðferðileg skylda okkar sem viljum teljast til tegundarinnar „homo sapiens“ og standa undir því að kallast viti bornar lífverur að beita öllum ráðum til að vekja andúð á styrjöldum. Það þarf meiri áræði og stórhug til að berjast fyrir friði en að vega menn.

John Lennon og Yoko Ono héldu merki friðarins á lofti. Þau brýndu fyrir mönnum að elska hver annan í stað þess að tortíma hver öðrum. Í þessum anda samdi Lennon lagið „Love“, sem Yoko Ono hefur sérstakt dálæti á. Þess vegna valdi hún þetta lag sem einkennislag friðarhátíðarinnar sem nú verður haldin í fyrsta sinn á Íslandi dagana 16. – 22. febrúar.

Hugmyndin er að kórar úr öllum heiminum sameinist í þessum fallega söng fyrir friði eina dagstund, síðdegis þann 22. febrúar. Þá munu íslenskir kórar koma saman í Hörpu og syngja þennan áhrifamikla friðarsöng. Og víðs vegar um lönd munu erlendir kórar syngja þennan sama söng á sama tíma, hver í sinni heimaborg.

Friðarhátíðin á að verða fastur liður í vetrardagskrá Reykjavíkur næstu árin. Þannig getum við Íslendingar vakið athygli á brýnum málstað friðarins um allan heim. Það yrði mikill heiður fyrir okkur ef landið okkar yrði með tíð og tíma miðstöð heimsfriðarins.

Reisum merki friðarins

Það er líka ánægjulegt að okkur skuli hafa tekist að vinna breska tónsnillinginn Ben Parry til fylgis við friðarhugsjónina, en hann hefur tekið að sér að verða listrænn stjórnandi hátíðarinnar árið 2015. Og það er vitað að þegar fram líða stundir hafa margir aðrir erlendir listmenn og kórar áhuga fyrir að leggja þessu þarfa málefni lið. Reykjavíkurborg leggur sitt af mörkum til friðarhátíðarinnar, auk þess sem ICELANDAIR hefur tekið að sér að vera öflugur bakhjarl hátíðarinnar, enda er öllum akkur í því á þessum miklu ófriðartímum að eyjan okkar í norðri verði ímynd friðar og andófs gegn hvers kyns hernaðarbrölti. Til þess höfum við alla burði sem herlaust land.

Það efast enginn um að stríð er vitfirring. Eina gyðjan sem vakir yfir stríðsrekstri er gyðja heimskunnar. Og þó að gyðjan sú skipi því miður býsna veglegan sess í lífi þjóðanna eigum við ekki að láta henni það eftir að hlakka yfir tilgangslausum manndrápum.

Við þurfum að reisa merki friðarins hátt á loft, láta ljósið frá friðarsúlu Yoko Ono lýsa frá Viðey um heima alla og stimpla okkur inn í vitund þjóðanna sem boðbera friðarins. Það er „markaðssetning“ sem verður okkur til framdráttar á alþjóðlegum vettvangi.

Kórar úr öllum áttum munu fylla alrýmið í Hörpu 22. febrúar til að leggja sitt lóð á vogarskálarnar. Kórarnir munu reyndar ekki aðeins syngja lagið „love“ heldur munu þeir líka gleðja gesti með flutningi á laginu To be graetful undir stjórn höfundarins Magnúsar Kjartanssonar, auk þess sem fleiri tónlistarperlur munu gleðja sinni gesta.

Nú þegar hafa rúmlega 700 kórfélagar svarað kallinu. Jafnframt hafa fjölmargir barnakórar boðað komu sína við setningu hátíðarinnar sem verður haldin í Ráðhúsinu mánudaginn 16. febrúar. Allir eru svo velkomnir á hátíðina 22 febrúar í Hörpu sem hefst kl 16:00.

Látum sönginn á þessari fyrstu friðarhátíð Reykjavíkur verða svo máttugan að hann ómi yfir höf og lönd og eggi þá sem heyra til að skipa sér í sveit með málsvörum friðarins.