Bang Gang vaknar úr dvalanum

„Þetta er fyrsta opinbera plötuútgáfan síðan árið 2008, ég gaf reyndar út eitt lag fyrir tveimur árum en ekki plötu,“ segir Barði Jóhannsson, sem er oftast kenndur við hljómsveitina sína, Bang Gang.

Fyrsta smáskífulagið, Out of Horizon, af væntanlegri plötu Bang Gang kemur út á mánudaginn. 

Barði segir að platan komi út í mars og kemur hún út um allan heim á sama tíma. „Platan verður jafn góð og hinar en allavega ekki betri,“ segir Barði léttur í lundu spurður út í nýju plötuna. „Ég tel að besta platan mín hingað til sé Best of Bang Gang platan.“

Hann nýtur liðsinnis nokkurra góðra gesta á plötunni. „Ég samdi eitt lag með Jófríði Ákadóttur úr Samaris og Helen Marnie úr Ladytron syngur og semur með mér eitt lag. Ég vann eitt lag með Bloodgroup og eins vann ég lag upp úr grunni sem ég gerði með Keren Ann og Bigga Veiru. Svo er ég með alls konar fólk með mér sem kemur að plötunni,“ útskýrir Barði, sem er farinn að huga að útgáfutónleikum hér á landi en veit þó ekki hvenær þeir verða.

Bang Gang hefur lítið komið fram á tónleikum á undanförnum árum. „Við fórum tvisvar til Kína á síðasta ári, það er mikil eftirspurn eftir Bang Gang í Kína og mér fannst fínt að fara þangað og spila gömlu plöturnar. Mér finnst ekkert gaman að spila á öðrum svæðum eins og í Evrópu, nema ég sé með eitthvað nýtt efni.“