Hagnast um 25,4 milljarða það sem af er ári

Hagnaður Arion banka á fyrstu níu mánuðum ársins var rúmum tólf prósentum meiri í ár en á sama tíam í fyrra. Alls nam hann 25,4 milljörðum króna. Stærstu ástæðurnar fyrir hagnaðinum er sala bankans á hlutum í fasteignafélaginu Reitum, drykkjaframleiðandanum Refresco Gerber og Símanum hf. Þetta kemur fram í fréttatilkynningu frá bankanum.

Arðsemi eigin fjár var 19,8 prósent en var 19,9 prósent á sama tímabili í fyrra. Hagnaður af reglulegri starfssemi nam 13,5 milljörðum króna samanborið við 11,4 milljarða á sama tímabili í fyrra. Heildareignir bankans jukustu um rúma sjötíu milljarða króna en þær nema nú tæpum 1.010 milljörðum.

Eiginfjárhlutfall bankans í lok tímabilsins var 23,5% og hefur dregist saman frá því um áramót en þá var hún 26,3% í árslok 2014. Lækkunin er einkum tilkomin vegna arðgreiðslu að fjárhæð 12,8 milljarðar króna og fyrirframgreiðslu á víkjandi lánum frá ríkinu að fjárhæð 20 milljarðar króna.

„Afkoma Arion banka á fyrstu níu mánuðum ársins er góð. Hún markast nokkuð af hagnaði af sölu á eignarhlutum í félögum í óskyldum rekstri í tengslum við skráningu þeirra á markað. Ljóst er að í framtíðinni mun draga úr áhrifum slíkra þátta á afkomu bankans sem þá verður borin uppi af hefðbundinni fjármálastarfsemi. Við erum vel undir þetta búin enda höfum við á undanförnum árum lagt áherslu á að styrkja grunnstoðirnar í rekstri bankans,“ segir Höskuldur H. Ólafsson forstjóri Arion banka.