Þetta hækkar hjá borginni

Borgarstjórn Reykjavíkurborgar samþykkti í gær gjaldskrárbreytingar fyrir næsta ár. Þar er gert ráð fyrir að gjaldskrártekjur á hverju sviði hækki að meðaltali um 3,2 prósent. Boðaðar lækkanir á leikskólagjöldum freistast vegna fjárhagsstöðu borgarinnar.

Gjaldskrárbreytingar í heild sinni má sjá hér á vef Reykjavíkurborgar, en þar má einnig sjá frekari upplýsingar um atriði eins og systkinaafslátt á leikskólum og frístundaheimilum. Hér að neðan verður farið yfir helstu atriði breytinganna.

Fæðisgjald hækkar

Gjaldskrá leikskóla breytist ekki, eins og sjá má á meðfylgjandi mynd. Hins vegar hækkar fæðisgjald um 3,1 til 3,2 prósent. Þannig hækkar fæðisgjald fyrir börn giftra foreldra eða sambúðarfólks sem er með börn í leikskóla í átta tíma á dag úr 8.060 í 8.320 krónur.

Vistun á frístundaheimilum hækkar lítillega í verði eða um 3,1 til 3,3 prósent. Vistun í fimm daga hækkar úr 12.350 í 12.750 krónur. Fjórir dagar hækka úr 10.080 krónum í 10.400 krónur. Þrír dagar fara úr 7.780 í 8.030 krónur. Tveir dagar úr 5.480 í 5.660 krónur og einn dagur úr 3.190 í 3.290 krónur.

Framlag vegna barna hjá dagforeldrum hækkar ekkert.

Sundferðin hækkar um 250 krónur

Stakt gjald í sund fyrir fullorðna hækkar úr 650 krónum í 900 krónur eða um 38,5 prósent.

Þá hækkar gjaldið fyrir borgarstarfsmenn úr 310 krónum í 320 krónur eða um 3,2 prósent. Leiga á handklæði hækkar úr 550 í 570 krónur.

Gjaldskrá Fjölskyldu- og húsdýragarðsins hækkar einnig en miðar fyrir börn 5 til 12 ára hækka úr 600 í 620 krónur. Miðar fyrir fullorðna hækka úr 800 í 840 krónur. Sömuleiðis hækka árskort fyrir einstaklinga úr 9.300 í 9.600 krónur og árskort fyrir fjölskyldur úr 18.100 í 18.80 krónur.

Eldri borgara borga meira

Sorphirðugjald hækkar ekki, þó hækkar gjald vegna endurvinnslustöðva fyrir íbúðarhúsnæði um 14,8 prósent. Úr 6.950 krónum í 7.980 krónur. Þá hækkar gjald fyrir aukalosun úr 3.720 í 3.790 krónur.

Þjónustugjöld fyrir íbúðir aldraðra hækka einnig um 3,2 prósent og heimaþjónusta hækkar um 3,1 prósent. Þar að auki hækkar akstursþjónusta fyrir eldri borgara úr 1.095 krónum á ferðina í 1.130 eða um 3,2 prósent.

Húsnæði og fæðisgjald í búsetuúrræðum hækkar einnig um 3,2 prósent.