Eva Laufey í tímariti Jamie Oliver

Matarbloggarinn og sjónvarpskokkurinn Eva Laufey Kjaran Hermannsdóttir birtist í Íslandsumfjöllun í desemberblaði tímarits kokksins Jamie Oliver. „Þau komu hingað í febrúar í fyrra og mitt hlutverk var að sýna þeim skemmtilega veitingastaði hér í Reykjavík,“ segir Eva Laufey.

Hún fékk sendan tölvupóst þar sem hún var spurð hvort hún hefði áhuga á að vera með, sem Eva Laufey var ekki lengi að samþykkja. Ásamt því að skoða veitingastaði í Reykjavík fóru blaðamennirnir einnig út á land, meðal annars á Hótel Búðir, í Stykkishólm og Ölvisholt.

„Þeim fannst þetta alveg ótrúlega skemmtilegt og það var sérstaklega gaman að sýna þeim staðina, þar sem þau voru svo hissa á hvað væru margir staðir hér miðað við hvað við erum fámenn þjóð. Þetta var mikið og skemmtilegt ævintýri,“ segir Eva, en umfjöllunin var hluti af lið í tímaritinu þar sem ólík lönd eru heimsótt og varð Ísland fyrir valinu í desemberheftið.

Þessa dagana er Eva Laufey að undirbúa nýja seríu af matreiðsluþáttum, en hún hefur verið í fæðingarorlofi síðan í sumar.