Fréttir Stöðvar 2 og Kryddsíldin: Fréttatími klukkan 12 og svo skemmtilegt ársuppgjör

Fréttamenn Stöðvar 2 og Bylgjunnar eru á vaktinni yfir hátíðarnar eins og alla aðra daga ársins.

Fréttir á gamlársdag verða í loftinu á Stöð 2 og Vísi, á samtengdum rásum með Bylgjunni, klukkan tólf á hádegi og verður þar meðal annars farið yfir nýjustu upplýsingar af bankaráninu sem framið var í Borgartúni í gær og kíkt á ríkisráðsfund á Bessastöðum.

Klukkan 14 fer svo hin sívinsæla Kryddsíld í loftið, en þar gerir fréttastofa 365 upp fréttaárið á áhugaverðan og skemmtilegan hátt. Rætt verður við formenn stjórnmálaflokkanna, Dóri DNA og Saga Garðars skemmta áhorfendum auk þess sem innlendur fréttaannáll og tónlistaratriði verða meðal dagskrárliða.

Fréttirnar verða, eins og alltaf, í opinni dagskrá og sama á við um Kryddsíldina. Þetta er 25. árið í röð sem Kryddsíldin er í beinni útsendingu Stöðvar 2 á gamlársdag og verður saga þáttarins rifjuð upp í innslagi.

Kryddsíldin verður einnig í beinni útsendingu hér á Vísi og mun upptaka af þættinum síðan rata á vefinn um leið og honum lýkur.