Leita hinnar ellefu ára gömlu Fannar sem slapp í Setberginu í gær

Leit stendur yfir að tíkinni Fönn sem er týnd á höfuðborgarsvæðinu. Fönn er ellefu ára gömul og gul labradortík sem hefur verið í pössun. Hún hvarf í Setbergshverfinu í Hafnarfirði um sexleytið í gærkvöldi og hefur hennar verið leitað síðan.

Björk Arnbjörnsdóttir segir í samtali við Vísi að Fönn hafi rokið af stað og hafi verið leitað að henni í Setberginu og Garðabæ í gær. Í morgun er talið að mögulega hafi sést til hennar í Grafarholtinu.

Í Facebook-hópnum Hundasamfélagið greinir Thelma Karen, dóttir Bjarkar, frá því að ekið hafi verið á Fönn á Reykjanesbrautinni en ekki liggi fyrir hvort eða hve mikið hún hafi slasast.

„Við vorum að leita að henni til miðnættis í gær,“ segir Björk sem vonast til þess að máttur Facebook og vökul augu fólks verði til þess að hægt verði að finna Fönn. Þegar hefur verið leitað á stöðum sem Fönn þekkir vel, svo sem á heimili hennar og á vinnustað eiganda hennar.

Fönn er ekki með ól þar sem hún var sem fyrr segir í pössun. Allar ábendingar eru vel þegnar í síma 894-4271 og hvetur Björk fólk til að deila fréttum af Fönn á Facebook í þeirri von um að upplýsingarnar rati fyrir augu einhvers sem gæti rekist á tíkina á höfuðborgarsvæðinu.