Gefa öllum börnum 10 til 15 ára flugeldagleraugu

Slysavarnafélagið Landsbjörg mun senda öllum börnum 10 til 15 ára gjafabréf fyrir flugeldagleraugum. Þetta er gert til að fyrirbyggja augnslys af völdum flugelda og er gert í samvinnu við Blindrafélagið, Sjóvá, Póstinn og Prentsmiðjuna Odda.

Í tilkynningu frá Landsbjörgu segir að samtals verði send 25.680 gjafabréf og að vonir standi til að gleraugun verði til þess að ekkert þeirra slasist á augum um áramótin. Þó sé rétt að ítreka að allir ættu að nota flugeldagleraugu, sama á hvaða aldri þeir eru, hvort sem viðkomandi er að skjóta upp eða eingöngu að horfa á.

„Fikt með flugeldavörur er of algengt hjá krökkum og þá sérstaklega strákum. Þeir taka flugelda í sundur, safna púðrinu saman og búa til sprengjur. Þessi leikur er stórhættulegur og foreldrar verða að vera vakandi og meðvitaðir um það sem börn þeirra eru að fást við þessa daga.

Annar hópur sem hefur verið að lenda í flugeldaslysum eru karlmenn á besta aldri. Oft er áfengi með í för þegar þau verða. Munum að áfengi og flugeldar eiga aldrei samleið.

Gjafabréfum á flugeldagleraugu má framvísa á öllum flugeldamörkuðum björgunarsveita Slysavarnarfélagsins Landsbjargar til að fá gleraugun afhent. Einnig fylgja flugeldagleraugu öllum fjölskyldupökkum sem seldir eru hjá björgunarsveitum,“ segir í tilkynningunni.

Flest slysanna má rekja til þess að hvorki er farið eftir grundvallarreglum um notkun flugelda né leiðbeiningum sem eru á vörunum og algengast er að einstaklingar slasist á höndum, andliti og augum.