Eigandinn deilir við bæinn um niðurníðslu á Friðarstöðum

 Kæru eiganda býlisins Friðarstaða á hendur Hveragerðisbæ hefur verið vísað frá úrskurðarnefnd umhverfis- og auðlindamála.

Eigandi Friðarstaða krafðist þess að úrskurðarnefndin ógilti bréf byggingarfulltrúa Hveragerðis sem skoraði á hann að koma ástandi mannvirkja á jörðinni í viðunandi horf.

Ásigkomulagi og viðhaldi heimalóðar Friðarstaða og nokkurra mannvirkja þar sagði byggingarfulltrúinn vera svo ábótavant að hætta stafaði af. Einkum væri ástand gróðurhúsa afar slæmt sem og umgengni á lóðinni.

Fór byggingarfulltrúinn fram á að ónýtir lausamunir yrðu fjarlægðir og að gengið yrði snyrtilega frá öðru. Þá sagði að yrði úrbótum ekki lokið 31. júlí 2015 á þessu ári yrði dagsektum beitt.

Meðal þess sem eigandi Friðarstaða segir í kæru sinni er að mál gróðurhússins sé til meðferðar hjá úrskurðarnefnd um viðlagatryggingu og ekki sé hægt að taka ákvörðun um það hús fyrr en niðurstaða liggi fyrir. Gróðurhúsið sé hluti dómsmáls milli eigandans og Hveragerðisbæjar. Líkur séu á að því máli verði skotið til Hæstaréttar og eigandinn telji sig ekki geta átt við það á meðan.

„Að öðru leyti sé umgengni á lögbýlinu ekki verri en hjá öðrum aðilum í atvinnurekstri í bænum,“ segir síðan áfram um sjónarmið kærandans í umfjöllun úrskurðarnefndarinnar.

„Á lögbýlinu séu tveir bílar í eigu aðila sem misst hafi hús sitt í jarðskjálftanum í maí 2008 og flutt burt úr bænum. Hafi þeir lofað að taka bíla sína burtu og verið í samskiptum við sveitarfélagið þar að lútandi. Þá sé erfitt að átta sig á því nákvæmlega hvað við sé átt í bréfi skipulags- og byggingarfulltrúa varðandi véla- og tækjahluti.“

Hveragerðisbær benti fyrir sitt leyti á að dagsektir hefðu enn ekki formlega verið lagðar á eiganda Friðarstaða. „Umrædd gróðurhús hafi verið í niðurníðslu allt frá því að þau hafi verið úrelt árið 2007 með sérstöku samkomulagi milli ábúenda og landbúnaðarráðherra.“

Þrátt fyrir að Hveragerðisbær hafi bent eiganda Friðarstaða á að snúa sér til úrskurðarnefndarinnar væri hann ósáttur við innihald bréfs byggingarfulltrúans og sagði úrskurðarnefndin málið ekki heyra undir hana þar sem með bréfinu hefði ekki verið tekin lokaákvörðun í málinu. Hins vegar hefðu borist fréttir af því að dagsektir hefðu nú verið lagðar á eftir að meðferð málsins hófst en að engin kæra hefði borist vegna þeirrar ákvörðunar.