Lyfja tvöfaldaði hagnað sinn

Hagnaður af rekstri samstæðu Lyfju hf nam 293 milljónum króna árið 2014. Hagnaðurinn rúmlega tvöfaldaðist milli ára, en hann nam 127 milljónum króna árið 2013. Eigið fé í lok ársins nam 2,6 milljörðum króna og hækkaði um tæpar 300 milljónir milli ára. Ekki verður greiddur út arður til hluthafa á árinu 2015.

Hlutafé félagsins nam 250 milljónum króna í lok ársins og var það allt eigu tveggja aðila. Í árslok átti Haf-Funding 85% eignarhlut en Glitnir 15% eignarhlut.

Rekstrartekjur á árinu námu 8,4 milljörðum dollara og hækkuðu um 200 milljónir milli ára. Hagnaður án afskrifta og fjármagnsliða nam 667 milljónum króna árið 2014.

Eignir félagsins í árslok námu 5,9 milljörðum króna og jukust um rúmar 100 milljónir milli ára. Handbært fé í árslok nam 192,5 milljónum króna og hækkaði um 155 milljónir króna milli ára.

Laun tveggja framkvæmdastjóra í samstæðunni og stjórnar móðurfélagsins námu 53 milljónum króna á árinu. Laun og launatengd gjöld námu samtals 1,45 milljörðum króna.