Hafði engar væntingar

?Ég er sextíu og fimm ára og var í virkilega vondu formi, enda hafði ég aldrei stundað líkamsrækt af neinu tagi – aldrei - Svo var ég kominn með mjög slæma sykursýki.

En ég byrjaði að ganga í ágúst á síðasta ári og er búinn að losna við fullt af kílóum, auk þess að vera nánast laus við sykursýkina, bara með því að hreyfa mig,? segir Steinþór Ólafsson bílstjóri og leiðsögumaður.

Hann kveðst hafa slegist í för með hóp sem nefnist Vesen og vergangur og er á vegum SÍBS.

?Ég hafði engar væntingar, bara mætti og hafði gaman af. Hópurinn er á netinu og það kostar ekkert að taka þátt. Einar Skúlason sér um göngurnar sem eru frábært framtak,? lýsir Steinþór og segir gengið tvisvar til þrisvar í viku.

En hvað dreif hann af stað? (Hann hlær við.) ?Ég labbaði frá Klapparstíg um Laugaveg niður í Lækjargötu og varð að stoppa nokkrum sinnum til að ná andanum. Stuttu seinna sá ég auglýsingu um göngur SÍBS.?

Nú kveðst hann stefna á Hnúkinn næsta sumar.

Forkólfurinn Einar Skúlason segir Steinþór geta sannarlega verið öðrum til eftirbreytni.

?Það hefur verið gaman að fylgjast með honum. Við gengum 2,5 kílómetra umhverfis Bessastaði í fyrstu ferð hans í ágúst en um síðustu helgi fórum við í níu kílómetra göngu milli Brynjudals og Botndals í Hvalfirði, með 300 metra hækkun og gengum í snjó allan tímann svo það voru háar hnélyftur.?