Hæfileikarækt gegn hryðjuverkum: Hvernig er aukin lýðræðisþátttaka ungmenna tryggð?

Seinastliðin ár hefur sá myrki veruleiki blasið við Vesturlöndunum að kosningarþátttaka ungmenna hefur tekið mjög krappa dýfu sem að virðist ekki enn vera á enda komin . Á sama tíma virðist svo vera að eina þátttaka sem færst hefur í aukanna sé þátttaka í öfgasamtökum , sama hvar hún fellur á pólitískum og trúarlegum skala. Miklar og þarfar umræður hafa vaknað sem afleiðing af því um hvernig sé hægt að vekja meiri áhuga á lýðræðislegum kosningum hjá ungu fólki. Ein af hugmyndunum sem skýtur hvað oftast upp kollinum er sú að hvetja þurfi ungmenni til aukinnar aðildar í frjálsum félagasamtökum og sjálfboðavinnu en mikil tengsl eru milli slíkrar þátttöku og kosningarþátttöku. Þrátt fyrir þetta hefur það hinsvegar reynst þrautinni þyngri að fá ungt fólk til að taka meiri þátt í þessu samtakastarfi.

Þann 21.-24. september tók Landsamband æskulýðsfélaga (LÆF) þátt í þriðju og seinustu vinnustofunni af þremur með öðrum evrópskum landssamböndum og frjálsum félagssamtökum. Markmiðið var að koma með tillögur til Evrópuþings um löggjöf á Evrópuskala til þess að hvetja ungt fólk til meiri þátttöku í sjálfboðaliða- og félagssamtakastörfum. Skýrt kom fram að erfitt sé fyrir evrópsk ungmenni að samtvinna nám og þátttöku í þverpólitískum samtökum. Séu þau viljug til þess að taka þátt kemur sú þátttaka oftast niður á námsframmistöð þeirra. Ástæðan er vegna þess að þessi þátttaka er til einskis metin þegar að kemur að námsframmistöðu. Til þess að bregðast við þessu vandamáli vann LÆF að tillögu sem felst í því að þátttaka í þverpólitískum samtökum verði metin inn í formlegt menntakerfi á Evrópuskalanum . Þannig munu nemendur hafa meiri hvata til þátttöku. Tillagan stingur einnig upp á sérstöku kerfi til að auðvelda menntastofnunum á lands- og Evrópuvísu að innleiða námsmatið.  

Það er von LÆF að ef þessi löggjöf nái fram að ganga og að ungmenni sjái hag sinn í því að taka þátt í samfélagi, bæði í félagssamtökum og sem kjósendur. Með þessu sköpum við virkara og samtvinnaðra samfélag. Ef atburðir síðasliðna vikna hafa kennt okkur sitthvað, liggur í augum uppi að hatri er ekki svarað með hatri. Þá er brýnt að virkja ungt fólk, eitt verðmætasta afl samfélagsins, hvetja þau til lýðræðislegrar þátttöku og efla fræðslu um fjölmenningu og margbreytileika. Það þarf að telja í þau trú um að með virkni innan félagasamtaka geti þau haft áhrif og breytt og bætt samfélaginu til hins betra. Því að þegar öllu er á botninn hvolft er forsenda þátttöku það, að hún sé metin að verðleikum með viðeigandi umbun.