Olíuverð hríðfellur: Býst við að bensínverð lækki á ný

Skörp lækkun hefur verið á Brent Norðursjávarolíu undanfarna daga. Síðastliðna viku hefur olíuverð fallið um 9,6  prósent. Fimmtudaginn 12. mars fór olíuverð hæst í 59,15 dollara á tunnu en um hádegisbilið í dag stóð olíuverð í 53,44 dollurum á tunnu.

Ástæða lækkunarinnar er taldin vera of mikið framboð á olíu. Reuters segir frá því að olíubirgðir í Bandaríkjunum hafi aukist um 10,5 milljónir tunna í 450 milljónir tunna í síðustu viku en greiningaraðilar hafi einungis spáð 3,8 milljón tunna aukningu. Olíuframleiðsla í Líbýu hefur einnig verið að ná sér á strik. Þá gæti framboð á olíu aukist enn frekar verði viðskiptaþvingunum á Írani aflétt. 

Runólfur Ólafsson, framkvæmdastjóri FÍB, býst við því að bensínverð þjónustustöðvanna lækki á næstunni. „Ég á von á því að menn lækki verð á næstu dögum. Venjulega er ekki nema 30 til 40 aura munur á þjónustu- og sjálfsafgreiðslustöðvum en munurinn nú er 2,20 til 2,30 krónur. Það er því líklegra að verð á þjónustustöðvunum fari niður en sjálfsafgreiðslustöðvarnar standi í stað,“ segir Runólfur.

Runólfur telur því að hækkanir stóru olíufyrirtækjanna muni því ganga til baka en Olís, N1 og Skeljungur hækkuðu öll verð á bensíni og díselolíu um helgina.

Telur álagningu olíufyrirtækjanna hafa lækkað

Runólfur segir álagningu olíufyrirtækjanna í febrúar og það sem af er mars vera álíka eða aðeins undir meðalálagningu síðasta árs miðað við útreikninga FÍB. Þessu hafi verið öfugt farið frá haustmánuðum og fram í janúar þegar álagning þeirra var með hæsta móti.

Þá segir Runólfur að stærsti áhrifaþátturinn í bensínverði frá áramótum hafi verið hækkun bandaríkjadals. „Dollarinn var í um 125 krónu seinnipartinn í desember en er nú í tæplega 140 krónum,“ segir hann.

Á ekki von á því að olíuverð nái sömu hæðum á næstunni

Runólfur býst ekki við því að olíuverð nái þeim hæðum sem það var í síðasta ári. Hann segir þó afar erfitt að spá fyrir um hvernig olíuverð muni þróast á næstu misserum. Það velti á ýmsum þáttum á borð við hagvöxt í heiminum og olíuframleiðslu sem geti breyst án fyrirvara. Einnig geti atburðir í heimspólitíkinni haft mikil áhrif. Þar megi nefna efnahagsþvinganir á Rússa í kjölfar aðgerða þeirra í Úkraínu.