Tregi á síðasta starfsdegi framkvæmdastjórans

Í gær var boðið upp á kveðjukaffi í Þróunarsamvinnustofnun Íslands. Það var síðasti starfsdagur stofnunarinnar og í dag verður hún lögð niður. Á nýju ári fer starfsfólk og starfsemi stofnunarinnar undir Þróunarsamvinnuskrifstofu utanríkisráðuneytisins. Öllu starfsfólki stofnunarinnar var boðið áframhaldandi starf nema framkvæmdastjóranum, Engilberti Guðmundssyni. Hann segir þessi tímamót tregablandin.

„Þetta er stofnun sem hefur starfað undir núverandi heiti í 34 ár. Hér hafa stafað hundruð Íslendinga og önnur hundruð útlendinga við þróunarsamvinnu. Þetta er auðvitað dálítil sorgarstund.“

Engilbert segir alltaf hafa legið fyrir að stofnunin og hann sem talsmaður hennar hafi lagst á móti breytingunum. „Til lengdar er hætta á að þetta dragi úr fagmennsku og við teljum betri stjórnsýslu að hafa skil á milli hins pólitíska ráðuneytis og hins faglega framkvæmdaaðila.“

Engilbert hefur einnig áhyggjur af þróunarsamvinnu á heimsvísu. „Ég er hræddur um að loforð manna vegna aðstoðar við að framfylgja Parísarsamningnum gangi ekki upp og einnig hafa fjölmörg Evrópulönd gefið það út að þau telji sig þurfa að taka fjármagn úr þróunarsjóðum til að styrkja móttöku flóttamanna. Grunnaðstoðin klemmist þarna á milli.“

Engilbert segir það sorglegt í ljósi þess að mikill árangur hafi náðst síðustu fimmtán ár og spár alþjóðastofnana eru að á næstu þrjátíu árum muni ekkert þeirra landa, sem fá aðstoð í dag, þurfa aðstoð. „En það er að því gefnu að þróunarsamvinnan haldi áfram með sama hætti.“

Engilbert lýkur því störfum með áhyggjur en hann hefur starfað í alþjóðasamvinnu síðustu þrjátíu ár. „Svo kemur nýtt ár og ég þarf að draga andann djúpt og venjast því í fyrsta skipti í hálfa öld að vera ekki að vinna á hverjum degi.“