Nokkuð verk fyrir höndum að meta tjón fyrir austan

Forsætisráðherra hefur óskað eftir að fulltrúar æðstu embættismanna, almannavarnadeildar Ríkislögreglustjóra, Viðlagatryggingar og fleiri aðila, meti, hvernig bregðast á við því mikla tjóni sem varð í óveðrinu á Austfjörðum síðasta sólarhringinn.

Óveðrið gekk með miklum látum yfir Austfirði í gærkvöldi og nótt og náði hámarki sínu snemma í morgun. Menn muna ekki annan eins veðurofsa en miklar skemmdir urðu á mannvirkjum, m.a. á Eskifirði þar sem hafrótið tók undirstöður gömlum bryggjuhúsum og tvær gamlar bryggjur þar eru algerlega horfnar.

Þá eru skemmdir á vegum og fokskemmdir víða á húsum og öðrum mannvirkjum. Þá þurfti að dæla vatni úr nokkrum húsum og negla niður þakplötur. Miklar skemmdir urðu einnig á Breiðdalsvík meðal annars á Hafnarhúsi þar sem sveitarfélagið hefur verið með aðstöðu og er þar allt á tjá og tundri samkvæmt upplýsingum frá björgunarsveitum.

Guðbrandur Arnarson, verkefnisstjóri aðgerðarmála hjá Slysavarnarfélaginu Landsbjörgu, bendir á að vandlega hafði verið varað við veðrinu og því hafi fólk verið eins vel undirbúið og hugsast gat. Veðurspá hafi algerlega gengið eftir.

„Við fylgdumst með útköllunum fara upp eftir Austurlandi. Við byrjuðum að fá fyrstu SMS skilaboðin rétt upp úr miðnætti í nótt. Svo sáum við flæðið fara frá Hornafirði, Öræfum upp eftir Austfjörðunum,“ segir Guðbrandur.

Sigmundur Davíð Gunnlaugsson forsætisráðherra óskaði eftir því síðdegis að kallaður verði sem fyrst saman hópur ráðuneytisstjóra, fulltrúa almannavarnardeildar Ríkislögreglustjóra, Viðlagatryggingar og fleiri aðila til að fara yfir þá stöðu sem skapast hefur á Austurlandi vegna óveðursins.  Hópnum er ætlað að meta hvernig bregðast megi við í samráði við heimamenn, en upplýsingar um hamfarirnar hafa nú þegar borist forsætisráðuneytinu þar sem unnið er að öflun frekari gagna.

„Við vorum þarna með tvö hundruð manns í verkefnum. Þetta gekk nú nokkuð vel. Það var reyndar ófært á milli flestra fjarða. Ekki óhætt að senda mannskap nema mikið lægi við. Það sem var undir núna var aðallega verðmæti sem hægt er að bæta. Sem betur fer urðu engin slys eða nokkuð sem ógnaði lífi manna,“ segir Guðbrandur.

Hann segir veðurhaminn hafa verið mestan á þremur stöðum.

„Á Eskifirði, Reyðarfirði og svo á Stöðvarfirði. Þetta eru þeir þrír staðir þar sem veðurhamurinn var mestur og skemmdirnar mestar,“ segir Guðbrandur Arnarson.