Flugeldaslysum hefur fækkað um þriðjung

Flugeldaslysum hefur fækkað um þriðjung á síðustu árum. Bráðalæknir segir sérstaklega jákvætt að alvarlegum augnslysum hafi fækkað og slysum á börnum. Hann hvetur fólk til að fara öllu með gát og segir ölvun og flugelda ekki fara saman.

Starfsfólk bráðadeilar Landspítalans býr sig nú undir nýársnótt sem jafnan er ein annasamasta nótt ársins á deildinni. „Við þurfum að kalla út extra mannskap til þess að reyna að sinna öllum fljótt og vel. Þannig að við höfum mjög fundið fyrir því að það sé mikið að gera þessa nótt síðustu árin,“ segir Jón Magnús Kristjánsson bráðalæknir á bráðadeild Landspítalans.

Hann bendir þó á að á síðustu árum hafi flugeldaslysum fækkað. „Við höfum séð um það bil þrjátíu slys á ári síðustu árin en það hefur fækkað niður í um það bil tuttugu síðasta ár,“ segir Jón. Hann segir sérstaklega ánægjulegt að augnslysum hafi fækkað verulega með aukinni notkun hlífðargleraugna. Þá hafi slysum á börnum fækkað mikið. „Núna eru þetta fyrst og fremst karlmenn, svona fullorðnir sem eru að lenda í slysum,“ segir Jón.

Jón segir mikilvægt að fólk fari varlega í kvöld og að hafi í huga að áfengi og flugeldar fari ekki saman. „Fólk þarf sérstaklega að hafa í huga að nota öryggisgleraugun. Það er lykilatriði. Það er líka ofsalega mikilvægt atriði að vera ekki að meðhöndla flugelda undir áhrifum áfengis. Áfengið og flugeldarnir fara verulega illa saman. Við sjáum oft að þeir sem koma hérna inn eftir slys eru undir áhrifum áfengis. Það þarf að hafa það í huga að vera ekki að fikta í flugeldunum. Við höfum á síðustu árum séð nokkur mjög alvarleg slys sem eru tengd við fikt,“ segir Jón.