Styrkja svæðiskerfi Landsnets á Austurlandi

Framkvæmdir eru að hefjast við lagningu 132 kílóvolta jarðstrengja frá Stuðlalínu 2 sunnan Eskifjarðar að tengivirki Landsnets á Eskifirði og áfram þaðan að loftlínum ofan við bæinn.

Í tilkynningu Landsnets kemur fram að áætlaður kostnaður við verkið sé 125 milljónir króna. Stefnt er að því að framkvæmdum ljúki á fyrsta fjórðungi næsta árs.

„Verkið felst í endurnýjun á þeim köflum Stuðlalínu 2 og Eskifjarðarlínu 1 sem eru í jörð á Eskifirði. Annars vegar verður lagður 1.200 metra langur jarðstrengur frá endastæðu Stuðlalínu 2, sunnan Eskifjarðar, að tengivirki á Eskifirði og hins vegar um 260 metra langur strengur frá tengivirkinu að endastæðu Eskifjarðarlínu 1, ofan við bæinn,“ segir þar.

Vinna við þverun Eskifjarðarár er hafin en skurður fyrir strengi verður grafinn eftir áramót. „Í framhaldinu verður hafist handa við lagningu strengjanna og er stefnt að spennusetningu á fyrsta ársfjórðungi 2016, en endanleg dagsetning ræðst af gangi framkvæmda og veðri.“

Framkvæmdirnar eru sagðar liður í styrkingu svæðiskerfis Landsnets á Austurlandi þar sem núverandi strengir anni ekki áætlaðri framtíðarnotkun. „Viðbúið er að framkvæmdirnar valdi tímabundnum truflunum, einkum næst framkvæmdasvæðinu.“