Liggur á gjörgæslu eftir vélsleðaslys

Önnur stúlkan sem lenti í vélsleðaslysi í Austur-Húnavatnssýslu í gær hefur verið útskrifuð af Landspítalanum en hin liggur á gjörgæslu. Líðan hennar er sögð stöðug. Stúlkurnar voru fluttar með sjúkraflugi frá Sauðárkróki í gær eftir að vélsleði sem þær óku endaði undir heyflutningsvagni.

Þrír af erlendu ferðamönnunum fimm, sem fluttir voru á sjúkrahús með þyrlum Landhelgisgæslunnar eftir bílslys í Öræfasveit, liggja enn á sjúkrahúsinu undir eftirliti lækna. Tveir voru útskrifaðir í gær að skoðun lokinni. Einn lést í slysinu en það átti sér stað á brú yfir Hólá, skammt frá Hnappavöllum, á fimmta tímanum í gær.