Líðan nýburans stöðug

Nýburinn, sem þyrla Landhelgisgæslunnar sótti á Neskaupstað í nótt, er enn í rannsóknum og líðan hans er stöðug. Óvíst er hvort hann þarf að fara í aðgerð eður ei.

Ekki var hægt að fljúga frá Norðfirði og var því gripið til þess ráðs að nota þyrlu gæslunnar en þyrluflugið tekur umtalsvert lengri tíma. Þyrlan lagði af stað austur á sjötta tímanum í gær og lenti á Reykjavíkurflugvelli á fjórða tímanum í nótt. Slæm veðurskilyrði voru fyrir austan og þurfti þyrlan að lenda í Breiðdalsvík og var nýburinn fluttur þangað landleiðina.

Oddskarðið var ófært þannig að sjúkraflutningamenn fengu leyfi að til að fara í gegnum nýju Norðfjarðargöngin svo barnið kæmist á leiðarenda.