Tillögur að gjörbreyttu bótakerfi tefjast

Ekki næst að skila tillögum um endurskoðun almannatryggingakerfisins á þessu ári. Þorsteinn Sæmundsson, formaður nefndar um endurskoðun kerfisins, sagði við Fréttablaðið í ágúst að stefnt yrði að því að skila tillögum í september. Þorsteinn segist nú telja að nefndin eigi eftir að funda tvisvar til viðbótar, einu sinni fyrir jól og svo aftur í janúar. Eftir það býst hann við því að hægt verði að skila tillögum.

Nefndin hefur stefnt að róttækum breytingum á almannatryggingakerfinu þar sem tekið verði upp starfsgetumat í stað örorkumats. Dregið verði úr skerðingum örorkubóta og eftirlaunaaldur verði sveigjan­legri. Áætlað er að kostnaður ríkisins af því að draga úr skerðingum örorkubóta geti numið allt að níu milljörðum króna á ári.

Jóna Valgerður Kristjánsdóttir, fulltrúi Landssambands eldri borgara í nefndinni, segir það vonbrigði að ekki hafi tekist að skila frá sér tillögum áður en Alþingi kom saman í haust líkt og stefnt hafi verið að. Búið sé að ná saman um breytingar sem snúa að ellilífeyrisþegum en enn sé tekist á um breytingar á örorkubótakerfinu.