39 lík á víð og dreif um höfuðborgina í dagrenningu

Talsmaður stjórnarhers afríska ríkisins Búrúndí segir að minnst 87 hafi fallið í átökum í höfuðborg landsins, Bujumbura, í gær.

Árásarhrina gærdagsins hófst með áhlaupi vopnaðra manna á þrjár hersveitir sem þær svo svöruðu með kúlnahríð. Upptökin eiga sér þó lengri sögu en mikil ólga hefur verið í landinu eftir að forseti Búrúndí, Pierre Nkurunziza tilkynnti að hann ætlaði að bjóða sig fram til endurkjörs í annað sinn.

Andstæðingar hans þustu út á götur og mótmæltu ákvörðun hans, friðsamlega í fyrstu, en þeir sögðu hana stangast á við stjórnarskrá landsins. Viðbrögð stjórnvalda við mótmælunum voru hörð og hefur fólk því tekið út reiði sína á her og lögreglusveitum landsins. Að minnsta kosti 240 hafa fallið síðan mótmælin hófust í maí síðastliðnum og um 200.000 flúið land.

Tóku menn af lífi á götum úti

Talsmaður hersins, liðþjálfinn Gaspard Baratuza, segir þá sem féllu í átökum gærdagsins ýmist „óvini ríkisins,“ hermenn eða lögregluþjóna. „Alls létust 79 óvinir í árásunum í gær, 45 voru handsamaðir og þá var lagt hald á 97 vopn. Átta hermenn og lögregluþjónar létu að sama skapi lífið og 21 særðist,“ sagði Baratuza við fjölmiðla í dag.

Áður hafði herinn gefið út að 12 hefðu dáið í átökunum en margir óttaslegnir vegfarendur í Bujumbura fóru að efast um þá staðhæfingu eftir að hafa gengið fram á tugi líkamsleifa á götum höfuðborgarinnar í morgun. Talið er að minnsta kosti 39 lík ungra manna hafi legið á víð og dreif um borgina.

Fjölmargir sjónarvottar hafa stigið fram og ásakað lögreglu og her landsins um að ganga á milli húsa, draga út unga karlmenn með valdi og taka þá af lífi. „Þetta voru bara börn sem tekin voru af lífi með skoti í hnakkann,“ er haft eftir einu vitni á vef Yahoo News. Stjórnvöld komu líkum þeirra sem féllu í dag fyrir í fjöldagröf skammt utan höfuðborgarinnar. Var það að sögn yfirvalda gert til að koma í veg fyrir útbreiðslu sjúkdóma. Stjórnarandstæðingar segja ástæðuna hins vegar vera aðra - stjórnarherinn hafi viljað fela öll ummerki um aftökurnar.