Desemberspá Siggu Kling – Naut: Allt að frétta í ástinni

Elsku nautið mitt. Úthald þitt og styrkleikar í svo mörgu eru svo sannarlega að koma í ljós.

Það er sko enginn sem getur slökkt á perunni þinni þó að ljósið sem þú hefur sent frá þér hafi verið misskært þá ertu að skrúfa inn 100 wöttin núna. Það getur reynt á að vera svona mikil ljósvera.

Þau feilspor sem þú hefur einhverjar áhyggjur af verða bara svolítið fyndin og manneskjurnar í kringum þig elska þig bara meira fyrir vikið.

Sum ykkar þurfa að slökkva á frestunarruglinu og þið ykkar sem það á við um skulið ekki vera að láta frestunarrottuna stoppa ykkur í neinu og einbeitið ykkur að því að gera það sem þið kvíðið fyrir ekki seinna en núna.

Stressið er að anda ofan í hálsmálið þitt núna en vittu til, þú munt hreinlega blása það í burtu!

Stóru breytingarnar hjá þér verða eftir jól og þá færðu mikinn styrk til að standa fast á þínu.

Þú færð ofurhetjukrafta og margir fyllast aðdáun á þér. Þú ert alveg einstakt, elsku nautið mitt, og þú vilt ekki heldur vera neinu líkt! Virkjaðu leiðtogann í þér, þó þú getir alveg fylgt öðrum er það er bara ekki þinn stíll.

Allt veltur á því hverju þú nennir og þetta er spennandi og ástríkur tími sem er að fara í hönd.

Klæddu þig vel og láttu þér ekki verða kalt. Álag og streita eða jafnvel of miklar tilfinningar sem fylgja blessaðri aðventunni geta lagst á öndunarfæri eða lungu því lungun okkar eru beintengd stressorkunni en þú munt bara blása hana í burtu!

Í ástinni er sko allt að frétta, það veltur bara á því hvort þú vilt lesa fréttirnar.

Mottó verða aldrei gömul, hér vel ég tvö sterk sem þú hefur fengið áður og þau eru að sjálfsögðu enn í gildi í desember þannig að þú skalt hafa þau hugföst í mánuðinum:

Framtíðin er núna.

Með einu skrefi fer allt af stað. Það er þitt að taka það.

Knús og koss, Sigga Kling

Fræg naut: Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon.