Aldrei einfaldara að taka þátt í Bréfamaraþoninu

Á árlegu Bréfamaraþoni Amnesty International í kringum 10. desember, sem er alþjóðlegur mannréttindadagur, setja hundruð þúsunda einstaklingar, frá 150 löndum og landsvæðum, nafn sitt á milljónir bréfa og korta til stjórnvalda sem brjóta mannréttindi og þrýsta á umbætur. Fjöldinn allur skrifar einnig stuðningskveðjur til þolenda mannréttindabrota og veita þeim þannig styrk og vissu um að umheimurinn hafi ekki gleymt þeim. Bréfamaraþon Amnesty ber nafn með rentu þar sem um stærsta mannréttindaviðburð heims er að ræða. 

Það hefur aldrei verið einfaldara að taka þátt í Bréfamaraþoninu. Ný vefsíða Íslandsdeildar Amnesty International hefur litið dagsins ljós, www.amnesty.is þar sem með einföldum hætti er hægt að skrifa undir tólf mál einstaklinga, sem sætt hafa mannréttindabrotum, með einum smell eða velja þau mál sem fólk kýs að skrifa undir. Það eina sem þarf að gera er að fylla út nafn og kennitölu og Íslandsdeild Amnesty sendir bréfin til stjórnvalda í þínu nafni. Hér er um afar einfalt en áhrifaríkt aðgerðaform að ræða.

Að venju býðst fólki einnig að mæta á þá staði á landinu sem næstir þeim eru, skrifa undir aðgerðakort á staðnum, senda stuðningskveðjur og njóta notalegrar aðventustemningar. Hægt er að kynna sér þá staði, víðs vegar um landið, sem halda Bréfamaraþon á nýju síðu samtakanna.

Á hverju ári bera bréfin og undirskriftirnar árangur.Raunverulegar breytingar eiga sér stað á lífi þolenda mannréttindabrota – lífi er bjargað! Samviskufangi er leystur úr haldi eða hlýtur nauðsynlega aðhlynningu. Fangi á dauðadeild er náðaður. Þolandi pyndinga sér réttlætinu fullnægt eða harðneskjulegri löggjöf er breytt.

Íslendingar hafa ekki látið sitt eftir liggja með þátttöku Bréfamaraþoni samtakanna og í fyrra voru 75.000 bréf, kort og undirskriftir sendar til stjórnvalda víðs vegar um heiminn og umbóta krafist.

Á bréfamaraþoni samtakanna í ár er hægt bregðast við vegna 12 áríðandi mála sem þurfa á athygli landans að halda. Meðal þeirra er mál Albert Woodfox sem hefur setið í fangelsi í Louisiana í Bandaríkjunum í 43 ár, þar af 40 ár í einangrun. Engar áþreifanlegar sannanir tengja Woodfox við glæpinn sem hann er ákærður fyrir.

Búrkína Fasó er einnig í brennidepli bréfamaraþonsins í ár en þar eru þúsundir ungra stúlkna þvingaðar í hjónaband á hverju ári. Í El Salvador er einnig brotið gróflega á mannréttindum kvenna og stúlkna þar sem blátt bann ríkir við fóstureyðingum í landinu. Mál Teodora del Carmen verður sérstaklega tekið fyrir en hún fæddi andvana barn árið 2007 og var í kjölfarið handtekin og dæmd í 30 ára fangelsi fyrir morð að yfirlögðu ráði. Allir þessir þolendur mannréttindabrota þurfa sárlega á aðgerðum þínum að halda.

Það kann að vera auðvelt fyrir stjórnvöld að hunsa eitt bréf en þegar milljónir slíkra bréfa berast er erfitt að líta undan.

Gott dæmi um raunverulega breytingu á lífi þolanda mannréttindabrots er saga Moses Akatugba, ungs manns frá Nígeríu sem var pyndaður grimmilega og dæmdur til dauða með hengingu aðeins 16 ára gamall fyrir það eitt að stela þremur farsímum. Á síðasta ári þrýstu rúmlega 300.000 manns, í bréfamaraþoni samtakanna, á fylkisstjórann á óseyrum Nígerfljóts að náða Moses og í maí 2015 lét fylkisstjórinn undan. Moses er nú frjáls maður.Hann lét eftirfarandi orð falla þegar ljóst var að hann yrði náðaður:

„Ég er djúpt snortinn. Ég þakka AmnestyInternational og aðgerðasinnum samtakanna fyrir stórkostlegan stuðning sem gerðu mig að sigurvegara í þessum aðstæðum. FélagarAmnestyInternational og aðgerðasinnar eru hetjurnar mínar. Ég fullvissa þá um að þessi ótrúlegi stuðningur sem þeir hafa sýnt mér er ekki fyrir borð borinn... Ég heiti því að gerast aðgerðasinni sjálfur og berjast fyrir aðra. Viltu ganga til liðs við mig? Viltu berjast fyrir frelsi annarra sem eru ranglega fangelsaðir með þátttöku í BréfamaraþoniAmnestyí ár?“

BréfamaraþonAmnestyInternational er vitnisburður um það sem samtökin standa fyrir – baráttu einstaklinga fyrir aðra einstaklinga, hverjir sem þeir eru og hvaðan sem þeir koma!