Fjárfestingabylgja í íslensku fiskeldi

Mikil fjárfestingabylgja stendur yfir í fiskeldi hér á landi. Gangi áætlanir eftir mun framleiðslan aukast mikið á næstu árum og áratugum en langur og hlykkjóttur vegur er framundan við að byggja upp fiskeldi í sjókvíum á Íslandi. Erlend fjárfesting leitar í greinina í meira mæli en áður.

Þetta kemur meðal annars fram í nýrri greiningu Sjávarklasans á Íslandi um efnahagsleg umsvif og afkomu sjávarklasans á Íslandi.

Þar segir að á árinu 2014 var um 8.300 tonnum eldisfisks slátrað og jókst framleiðslan um 20% milli ára. Ef fram heldur sem horfir mun framleiðslan svo aukast um 40% á þessu ári, mest í laxi og regnbogasilungi.

Það sem nú er einkum breytt frá fyrri tilraunum til mikillar uppbyggingar í sjókvíaeldi hérlendis er aðkoma erlendra fjárfesta og sérfræðinga að fyrirtækjunum sem stórtækust eru í fjárfestingum. Fjarðalax, Arnarlax og Dýrfiskur eru til að mynda öll með erlenda fjárfesta og Stolt Sea Farm er alfarið í eigu erlendra aðila. Við þessar staðreyndir úr skýrslunni má bæta nýjustu fréttum þar sem Fiskeldi Austfjarða hefur selt 50% í fyrirtækinu til norskra eldismanna.

Séu bjartsýnustu spár fyrirtækjanna lagðar saman fæst framleiðsla upp á ríflega 100 þúsund tonn á ári innan nokkurra áratuga. Ástæða þess að fyrirtækin bæta nú í áform sín er mat þeirra að til að ná nauðsynlegri stærðarhagkvæmni verði framleiðsla þeirra að vera nálægt 20.000 tonnum árlega.