Hegðun Bieber ekki til fyrirmyndar en myndbandið frábær landkynning

Myndband kanadíska tónlistarmannsins Justin Bieber við lagið I‘ll Show You, sem allt var tekið upp hér á landi, hefur vakið mikla athygli síðan að það birtist á netinu í gær. Ísland er sýnt í afar fallegu ljósi í myndbandinu og hafa athugasemdirnar hrannast inn á Youtube þar sem fólk dásamar fegurð landsins.

Bieber stingur sér meðal annars til sunds í Jökulsárlóni en samkvæmt upplýsingum frá lóninu er ekki stranglega bannað að fara út í lónið. Það er nokkurs konar óskráð regla að ekki eigi að fara út í og starfsfólk lónsins mælir ekki með því þar sem það geti verið stórhættulegt.

Umræður sköðuðust um myndbandið inni á Facebook-síðu Baklands ferðaþjónustunnar. Davíð Samúelsson, leiðsögumaður og ferðaráðgjafi, velti því upp hvort við vildum auglýsa landið með þessum hætti þar sem ekki er hættulaust að fara á nærbuxunum einum klæða út í lónið.

Sjá einnig: Fækkuðu fötum og fífluðust við Jökulsárlón

Þarf að umgangast íslenska náttúru af varúð

„Ég er nú aðallega svona að kveikja umræðu um þetta því við þurfum einfaldlega að umgangast íslenska náttúru af varúð. Auðvitað er frábært að fá svona rosalega mikla landkynningu í gegnum myndband Bieber en ég set spurningamerki við það að fara ofan í Jökulsárslón. Í því samhengi megum við ekki gleyma því að Justin Bieber er stórstjarna og ákveðinn „trendsetter“ og þarna er hann að gera eitthvað sem er ekki til eftirbreytni,“ segir Davíð og bendir á að ferðamönnum hafi oftar en einu sinni verið bjargað af jöklum á lóninu eftir að hafa komist í sjálfheldu.

Davíð starfaði um árabil fyrir markaðsstofu Suðurlands og upplýsingamiðstöð sama landshluta. Hann leggur áherslu á að sér þyki frábært að fá þessa kynningu fyrir Suðurland en segir reynsluna sýna að það vanti meiri upplýsingamiðlun til ferðamanna.

„Save Travel er mjög gott framtak en það er svo mikið af ferðamönnum á eigin vegum að það þarf að hafa öryggis- og upplýsingamiðstöðvar um landið þar sem fólki er veitt ráðgjöf. Það er einfaldlega staðreynd að ríkið þarf að standa miklu betur að þessu.“

„Ísland sýnt í alveg frábærlega fallegu ljósi“

Jón Ásbergsson, framkvæmdastjóri Íslandsstofu, segir engan vafa leika á því að góð landkynning felist í myndbandinu.

„Justin Bieber er enginn venjulegur skemmtikraftur. Hann er einn vinsælasti skemmtikraftur í heimi eins og sést á því að myndbandið hefur fengið yfir fjögur milljón áhorf. Þarna er Ísland sýnt í alveg frábærlega fallegu ljósi og þetta er bara byrjunin þar sem myndbandið á eftir að fara í miklu hærri hæðir en fjórar milljónir,“ segir Jón.

 

Aðspurður um verðmætin sem felist í svona landkynningu segir hann erfitt að setja verðmiða á hana. Jón bendir þó á að í könnun sem gerð var fyrir Ferðamálastofu í fyrra kom í ljós að rúm 14 prósent þeirra sem heimsóttu Ísland sögðu alþjóðlegt myndrænt efni á borð við kvikmyndir og tónlistarmyndbönd. Myndband Bieber falli vissulega í þennan flokk.

„Þeir sem horfa á Justin Bieber eru kannski ekki endilega okkar markhópur svo þetta er ekki þráðbein markaðssetning núna en til lengri tíma litið mun það vissulega hafa jákvæð áhrif.“

Á ystu nöf í íslenskri náttúru

En hvað með sumt af því sem söngvarinn gerir, eins og að fara í sund í Jökulsárslóni?

„Jú, það er alveg rétt að hann fer á vissum stöðum á fremstu brún og við erum ekkert að biðja fólk um að baða sig í Jökulsárslóni. Það er því ekki hægt að segja annað en að hann fari á ystu nöf og ef maður hefði mátt gera einhverjar athugasemdir þá er hann þarna að sýna af sér hegðun sem við viljum ekki að allir sýni. Á móti kemur að hann er ekki að keyra um á jeppa yfir gróið land eða sanda. Hann er því ekki að eyðileggja neitt heldur þvert á móti fer hann um stíga og vegi sem eru til þess gerðir.“