Sterkur varnarleikur skilaði Jóni Arnóri og félögum sigri

Valencia vann öruggan sigur, 76-56, á Obradorio CAB í eina leik dagsins í spænsku úrvalsdeildinni í körfubolta í kvöld. Valencia hefur unnið alla fjóra leiki sína í deildinni til þessa.

Jón Arnór Stefánsson skoraði sjö stig, tók eitt frákast og gaf þrjár stoðsendingar í liði Valencia en hann lék í rúmar 17 mínútur.

Valencia spilaði hörkuvörn í leiknum í kvöld og þá sérstaklega í 1. leikhluta þar sem Obradorio skoraði aðeins fimm stig.

Staðan var 36-19 í hálfleik og í seinni hálfleiknum jókst munurinn um þrjú stig. Lokatölur 76-56, Valencia í vil.