Stundin sökuð um subbulegar árásir á Illuga eftir að hann birti brot úr skattaskýrslu sinni

Illugi Gunnarsson menntamálaráðherra birti óvænt í gærkvöldi upp úr skattskýrslu sinni og konu sinnar, þá í tengslum við mál sem mjög hefur verið á döfinni og varðar launagreiðslur hans frá Orku Energy og hugsanlegt vanhæfi hans vegna tengsla við fyrirtækið.

Vísir greindi frá málinu þá þegar.

Illugi fylgdi upplýsingum úr skattskýrslu sinni úr hlaði með orðunum: „Vegna fréttar Stundarinnar frá því í dag, sem byggð er á ónafngreindum heimildarmanni, hef ég ákveðið að stíga það skref að birta upplýsingar úr skattframtali okkar Brynhildar vegna ársins 2012 og ársins 2013.“

Viðbrögðin hafa ekki látið á sér standa og telja vinir Illuga og stuðningsmenn um rótarlegar og viðbjóðslegar árásir af hálfu Stundarinnar að ræða, hvar ráðist er inn á einkalíf ráðherrans.

Fjallað um A en Illugi svarar með B

Ingi Freyr Vilhjálmsson hefur einkum fjallað um málið af hálfu Stundarinnar. Hann klórar sér í kollinum vegna þessa útspils ráðherrans.

„Frétt Stundarinnar fjallaði um OG Capital og greiðslur til þess félags árið 2012 en ekki greiðslur beint til Illuga. Í frétt Stundarinnar kemur fram að greiðslan frá Orku Energy til OG Capital hafi orðið eftir inni í félaginu og ekki verið greidd út úr því sem laun. Þessari frétt svarar Illugi með því að tala um launagreiðslur til sín á árinu 2012 jafnvel þó að ekki sé fjallað um launagreiðslur út úr OG Capital til lluga árið 2012 í fréttinni. Ég fjalla um B í frétt og Illugi svarar fréttinni með því tala bara um A en ekki B. Illugi hafnar með öðrum orðum ekki frétt Stundarinnar í færslu sinni heldur kýs hann þess í stað að tala ekki um hana efnislega heldur eitthvað annað,“ segir Ingi Freyr – en honum blaðamanninum, finnst beinlínis sérkennilegt að vera kominn í þá stöðu að tjá sig um sig efnislega um það.

Hér má sjá umrædda frétt Stundarinnar.

Vegna fréttar Stundarinnar frá því í dag, sem byggð er á ónafngreindum heimildarmanni, hef ég ákveðið að stíga það skref...

Posted by Illugi Gunnarsson on 14. október 2015

Hið furðulegasta mál

Annar blaðamaður Stundarinnar, Jóhann Páll Jóhannsson, sem helst er þekktur fyrir að hafa fjallað ítarlega um „Lekamálið“ sem að lokum varð til þess að Hanna Birna Kristjánsdóttir sagði sig frá ráðherradómi, furðar sig einnig á þessu útspili og skrifar á Facebook: „Frétt Stundarinnar fjallaði um greiðslur Orku Energy til OG Capital, fyrirtækis Illuga, eftir að Illugi settist aftur á þing. Hann bregst við fréttaflutningnum með því að birta persónulegt skattframtal sitt og konunnar sinnar en staðfestir hvorki fréttina né hafnar henni. Þetta er allt hið furðulegasta mál.“

Fólskulegar árásir á Illuga

Vinir Illuga á Facebook velkjast hins vegar hvergi í vafa um hvernig beri að skilja ráðherra. Þeir telja hann mega sæta ofsóknum af hálfu Stundarinnar. Svo vitnað sé í nokkrar athugasemdir af handahófi: „Það er ekki „Stundarfriður“ fyrir þessum kjánum.“ 

„Dapurlegt að þetta skuli vera komið á þetta plan.“ Og: „Það á ekki að elta ólar við slefberana lengur. Láttu þá slefa og slefa, þangað til þeir kafna í eigin slefi.“ „Láttu þessa andskota finna fyrir því Illugi.“ og einn segir: „Óþolandi ósvífni í fólki,það á ekki að ráðast inn á einkalíf fólks.“ Og ein skrifar í athugasemd: „Guð minn almáttugur, hvað rótarskrif eru orðin Ljót. Það þarf að stoppa Ærumeiðandi, skrif!“

Athugasemdir sem þessar hrannast inn á vegg Illuga og á sinni Facebooksíðu skrifar bæjarstjórinn í Eyjum, Elliði Vignisson um þetta sama mál:  „Jæja, hvað næst? Upplýsingar um notkun lyfseðilskyldra lyfja? Ítarlegt niðurbrot á því áfengi sem ráðherrann hefur drukkið? Afrit af öllum þeim gögnum sem til eru um ráðherrann á öryggismyndavélum verslana?“

Jæja, hvað næst? Upplýsingar um notkun lyfseðilskyldra lyfja? Ítarlegt niðurbrot á því áfengi sem ráðherrann hefur drukkið? Afrit af öllum þeim gögnum sem til eru um ráðherrann á öryggismyndavélum verslana?

Posted by Elliði Vignisson on 14. október 2015