Persónuleikar

Við mannfólk skilgreinum okkur út frá persónuleika, sem er að mestu leyti myndaður á mótunarárunum. Flest erum við t.d. alin upp við að við eigum að vera góð við dýrin og það er stór hluti af persónuleika okkar. Flest erum við líka alin upp við að borða kjöt og afurðir dýranna sem við eigum að vera góð við. Þessi tvískinnungur er að verða vandræðalegri með hverjum deginum, meðfram batnandi vitneskju okkar á hvað er innifalið í matnum okkar.

Þegar við kaupum dýraafurð erum við að greiða atkvæði með því að dýr séu notuð gegn þeirra vilja, sem inniheldur alltaf þjáningar og endar alltaf með slátrun. Við erum ekki að vera góð við dýrin á meðan við styðjum við óþarfa misnotkun þeirra. Þvert á móti, erum við að taka þátt í mestu grimmd sögunnar. Meira en 150 milljarðar dýra eru drepin í dýraafurðaiðnaðinum á hverju ári. Þau hafa öll persónuleika eins og hundar og kettir og aðrar dýrategundir sem við höfum fengið að kynnast og vingast við. Þau hafa öll sömu getu og við til að upplifa gleði og vellíðan, sársauka og eymd.

Það vilja fáir vera vondir við dýr en átta sig ekki á hversu slæm áhrif þeir eru að hafa á líf þessara einstaklinga. Dýraafurðaiðnaðurinn hefur með streitulausum herferðum plantað í okkur ímyndum af glöðum kúm og brosandi svínum og við höldum að það sé komið fram við dýrin af mannúð og virðingu, en raunveruleikinn er allt annar. Meira en 99% af dýraafurðum koma úr verksmiðjuframleiddum einstaklingum. Iðnaðarstaðlar eru meðal annars að skera gogga af hænum, hakka niður dags gamla hanaunga, aðskilja kálf og kú í síðasta lagi daginn eftir fæðingu og skorða óléttar gyltur svo þröngt að þær geta ekki snúið sér. Nýlega höfum við fengið innlendar fréttir af slíkri meðferð.

Sorglega algengur misskilningur er að við þurfum á dýraafurðum að halda til að fá ákveðin næringarefni úr fæðunni, en staðreyndin er sú að við getum verið fullkomlega heilsuhraust án allra dýraafurða, þó að rannsóknir sem dýraafurðaiðnaðurinn hefur kostað ríkulega segi annað.

Þar að auki er dýraafurðaiðnaðurinn fáránlega umhverfisspillandi. Meira en helmingur allrar mengunar af okkar völdum stafar af dýraafurðaiðnaðinum. Þriðjungur af landsvæði jarðar fer í að rækta fóður fyrir dýrin sem við borðum og fer vaxandi. Til að framleiða 1kg af kjöti þurfum við a.m.k. 14 sinnum meira landsvæði en það sem fer í að framleiða sama magn af baunum, ávöxtum og grænmeti. Einn af hverjum níu af mannkyninu lifir við hungursneyð og árlega deyja meira en 3 milljónir barna úr hungri. Ef við myndum hætta að borða dýraafurðir, gætum við nýtt landið margfalt betur og gætum því útrýmt hungursneyð og í leiðinni snarminnkað gróðurhúsaáhrifin. En best af öllu, við gætum hætt að hafa samviskubit yfir því að koma illa fram við dýrin.

Niðurstaða: Persónuleikar okkar eru jafn mismunandi og þeir eru margir, en langflest okkar eru á þeirri skoðun að við eigum að vera góð við aðra, menn og dýr. A.m.k. ættum við að gera okkar besta til að komast hjá því að skaða aðra. Það besta sem hægt er að gera fyrir dýrin, jörðina og okkur sjálf, er að hætta stuðningi við framleiðslu dýraafurða. Og ef við pælum í því, þá er það í fullkomnum takti við persónuleika okkar.

Verum góð. Verum réttlát. Verum vegan.