Segir eigendur sjávarútvegsfyrirtækja gráta í fjölmiðlum til að hafa áhrif

Mörg hundruð störf á landsbyggðinni á komandi loðnuvertíð eru í algeru uppnámi vegna viðskiptabanns við Rússa. Þá er ljóst að ekki verða mikil uppgrip í viðkomandi samfélögum vegna vertíðarinnar en 80 prósent af frystum loðnuafurðum fóru á Rússlandsmarkað.  Formaður Samtaka fyrirtækja í sjávarútvegi segir að þetta verði þungt högg fyrir marga litla staði, svo sem Vestmanneyjar, Fáskrúðsfjörð, Neskeupsstað og Þórshöfn.

Þórólfur Matthíasson hagfræðingur og prófessor við HÍ segir að sjávarútvegurinn sé vanur að bregðast við sveiflum og hafi þróað sín fyrirtæki til að bregðast við sveiflum. Hann efist því ekki um að sjávarútvegsfyrirtækin lifi þessar breytingar af. Það sé þó eðlilegt að menn séu dálítið í öngum sínum. Rætt var við hann í fréttum Stöðvar 2 í kvöld.

Voru ekki hoppandi á húsþökum

Hann segir að eigendur sjávarútvegsfyrirtækjanna gráti svolítið í fjölmiðlum til að hafa áhrif á stjórnvaldsaðgerðir líkt og önnur stórfyrirtæki. Það sé ekkert óeðlilegt.

Makríllinn hafi synt inn í landhelgina fyrir nokkrum árum síðan en aflaverðmæti hans sé um fimmtán milljarðar samkvæmt hagstofunni.  Það sé hrein viðbót við tekjur þessara fyrirtækja og þeir séu því vel undirbúnir undir slaka. Þeir hafi ekki verið hoppandi á húsþökum þegar makríllinn kom en séu fljótir til að láta vita ef stjórnvaldsákvarðanir hafi neikvæð áhrif á þá.

Snýst ekki bara um makríl

Jens Garðar Helgason segist eiga erfitt með að skilja rök prófessorsins enda snúist málið ekki bara um makríl. Áttatíu prósent af frystum loðnuafurðum fari á Rússlandsmarkað, þegar sá markaður sé úr sögunni fari sú loðna í bræðslu.

Það séu mörg hundruð störf í húfi á loðnuvertíðinni því ef loðnan fari í mjöl og lýsi verði uppsjávarfrystihúsin rekin á litlum eða engum afköstum. Þá glatist mörg hundruð störf. Hann skilj heldur ekki rök prófessorsins, hvað varði makrílinn því hann horfi fram hjá því að það hafi farið fram gríðarleg fjárfesting í greininni, þetta væri svipað og að segja að það yrði ekki áfall fyrir ferðaþjónustuna ef ferðamenn hættu að koma til landsins.