Dæmdur kynferðisbrotamaður: Framseldur til Íslands frá Hollandi

Ingvar Dór Birgisson, þrítugur karlmaður, var handtekinn í Hollandi í desember síðastliðnum eftir að hafa flúið land. Þegar hann hélt af landi brott var yfirvofandi dómur í kynferðisbrotamáli auk þess sem Ingvar Dór er grunaður um sambærilegt kynferðisbrot sem lögregla hefur til rannsóknar. Ingvar fékk þriggja og hálfs árs fangelsisdóm í janúar síðastliðnum fyrir nauðgun. Hann var framseldur til Íslands frá Hollandi í júní og situr nú í gæsluvarðhaldi.

Nauðgunin, sem Ingvar Dór hlaut dóm fyrir í janúar síðastliðnum, átti sér stað snemma árs 2010. Kæra var lögð fram í júní það ár eða fyrir rúmlega fimm árum. Hlaut Ingvar Dór þriggja og hálfs árs fangelsi í september 2013 en málinu var áfrýjað til Hæstaréttar sem vísaði því aftur heim í hérað. Ástæðan var að Hæstiréttur taldi að verulegir annmarkar hefðu verið á rannsókn málsins og héraðsdómur hefði ekki lagt mat á öll þau sönnunargögn sem færð hefðu verið fram.

Sjá einnig:Flúði til Cayman eyja

Aðalmeðferð fór fram að nýju í lok síðasta árs. Meðal sönnunargagna í málinu var ljósmynd í farsíma Ingvars Dórs sem tekin var sama dag og nauðgunin átti sér stað. Hún sýndi nakin rass í rúmi hans. Ingvar Dór viðurkenndi að myndin væri tekin í rúmi hans en væri ekki af stúlkunni. Stúlkan þekkti hins vegar rassinn og sagðist hafa snúið sér við um leið og hann var að taka myndina.

Þótti framburður stúlkunnar trúverðugur á sama tíma og engar góðar skýringar hefðu komið fram hjá hinum dæmda. Einn dómari taldi þó ósannað að kynferðismök hefðu átt sér stað og taldi að sýkna ætti Ingvar Dór af þeirri ákæru. Hann ætti þó að greiða skaðabætur. Hlaut Ingvar Dór þriggja og hálfs árs dóm á ný.

Málinu er ekki enn lokið því dómnum hefur verið áfrýjað til Hæstaréttar þar sem það verður tekið fyrir í lok september. Þinghald verður lokað.

Nýtflutt til Íslands og taldi Ingvar Dór vera 16 eða 17 ára

Ingvar Dór var dæmdur fyrir að hafa annars vegar áreitt 14 ára stúlku kynferðislega á heimili sínu og í síðari heimsókn stúlkunnar nauðgað henni. Stúlkan, Chastity Rose Dawson Gísladóttir, lýsir í viðtali við Pressuna hve biðin eftir því að málinu ljúki sé óbærileg og hafi markað djúp spor í líf hennar.

Sjá einnig:Þrjú og hálft ár fyrir að nauðga fjórtán ára stúlku

Chastity segist hafa komist í kynni við manninn í gegnum forritið Compare Hotness. Hún hafi verið nýflutt til Íslands frá Bandaríkjunum, ekki þekkt marga og verið í vinaleit. Taldi hún Ingvar líklega sextán eða sautján ára gamlan.

Samkvæmt heimildum Vísis er Ingvar Dór til rannsóknar vegna sambærilegs kynferðisbrots og það sem hann hlaut dóm fyrir nú í janúar. Hann flúði sem fyrr segir Ísland í desember,  var framseldur til Íslands í júní og situr nú í gæsluvarðhaldi samkvæmt upplýsingum frá lögreglunni á höfuðborgarsvæðinu. Hann flúði einnig til Cayman-eyja á meðan á rannsókn lögreglu stóð árið 2012 og gekk illa að birta honum ákæru. Þetta er því í annað skiptið sem hann flýr land vegna málsins.

Chastity segir í samtali við Vísi hafa opnað sig vegna málsins á Facebook fyrir tveimur árum vegna seinagangsins. Henni fannst vera kominn tími á að almenningur yrði upplýstur þar sem svo hægt gengi að fá niðurstöðu í málið sem hafi verið á borði lögreglu frá því sumarið 2010.