Í þriggja og hálfs ára fangelsi fyrir að nauðga 14 ára stúlku

Ingvar Dór Birgisson var í dag dæmdur í þriggja og hálfs árs fangelsi í Héraðsdómi Reykjavíkur fyrir að hafa tvívegis beitt unga stúlku kynferðisofbeldi. Maðurinn, sem var 25 ára gamall þegar brotin voru framin á heimli mannsins í miðborg Reykjavíkur fyrir rúmum þremur árum, beitti 14 ára stúlku kynferðisofbeldi. Í fyrra skiptið áreitti hann stúlkuna kynferðislega. Í seinna skiptið nauðgaði hann stúlkunni og lét ekki af háttsemi sinni fyrr en að stúlkan hafði ítrekað beðið hann um hætta.

Í dómi Héraðsdóms Reykjavíkur kemur fram að brot ákærða séu alvarleg. Við ákvörðun refsingar var litið til þess að hann braut gegn mjög ungri stúlku, á viðkvæmu þroskaskeiði hennar. Á ákærði sér engar málsbætur.

Málið dróst nokkuð í meðförum lögreglu þar sem hinn ákærði fór af landi brott til Cayman eyja og dvaldi þar í talsverðan tíma. Ákæra í málinu var gefin út 10. maí 2012 og var fyrsta fyrirkall gefið út 18. sama mánaðar. Ekki tókst að birta ákærða það fyrirkall, né fyrirköll gefin út 6. og 18. júní 2012, þar sem ekki hafðist uppi á ákærða. Fyrirkall útgefið 28. júní 2012 tókst að birta og var málið þingfest 9. júlí 2012.

Fyrir þingfestingu fór ákærði af landi brott og til Cayman eyja. Kom hann þeim boðum áleiðis til dómsins að hann væri ekki á leið til landsins í náinni framtíð. Að kröfu sækjanda var gefin út handtökuskipun á hendur ákærða 18. október 2012 í en á þeim tíma var ákæruvald með áform um að fá ákærða framseldan frá Cayman eyjum. Ákærði mætti í dómi 10. júní 2013 þar sem hann fékk frest til að taka afstöðu til sakarefna. Var hann úrskurðaður í farbann 11. júní 2013 þar til dómur yrði kveðinn upp í máli hans.

Maðurinn var jafnframt dæmdur til að greiða stúlkunni 900 þúsund krónur í miskabætur.