Tilboði Alvogen hafnað en hafa enn áhuga

Lyfjafyrirtækið Alvogen vill kaupa lyfjaverksmiðju Actavis í Hafnarfirði. Tilkynnt var um lokun verksmiðjunnar síðastliðinn mánudag. 300 störf flytjast þá frá Íslandi til annarra landa þar sem fyrirtækið hefur starfsemi. 

Róbert Wessman, forstjóri Alvogen og fyrrverandi forstjóri Actavis, segir að tilboði fyrirtækisins hafi beinlínis verið hafnað en hann segir Alvogen enn haga áhuga hjá á að kaupa starfsemina.

„Því var í rauninni beinlínis hafnað. Við buðum að okkar mati, sem er trúnaðarmál, mjög hagstætt verð fyrir Actavis svona miðað við hvað er verið að borga fyrir svona eignir í dag og svona starfsemi,“ segir hann. 

„Við lögðum fram tillögur sem snérust annars vegar um verksmiðjuna og hins vegar íslenska markaðinn, að taka hann með í kaupunum, því í sjálfu sér er erfitt að taka eingöngu yfir verksmiðjustarfsemi þar sem það tekur ákveðin tíma að byggja upp ákveðin tíma að byggja upp ný verkefni fyrir okkur,“ segir Róbert um tilboðið.

Róbert segist hafa talið að þar sem Actavis hafi selt frá sér flesta markaði í Evrópu hafi það í sjálfu sér ekki verið mál að láta íslenska markaðinn fylgja með, enda smár markaður og framleiðnin ekki há fyrir jafn stórt fyrirtæki og Actavis. Hann segir að viðskiptin hafi strandað á því.

Róbert segir Alvogen telja sig geta nýtt starfsemina vel en hann vann sjálfur í mörg ár með því fólki sem starfar í lyfjaverksmiðju Actavis.

„Við teljum okkur geta nýtt þessa starfsemi vel, við þekkjum þessa starfsemi að sjálfsögðu vel, ég starfaði þarna eins og flestir vita í mjög mörg ár og þekki mikið af starfsfólki þarna, og teljum okkur geta nýtt þessa verksmiðju ekki bara hér heima heldur á okkar mörkuðum, en eins og menn kannski vita þá er Alvogen núna í 35 löndum og höfum svona aðeins verið að svipast eftir meiri framleiðsluafköstum,“ segir hann.

Róbert segir það einnig vondar fréttir ef starfsemin leggist af. „Það væri mikil synd að missa 300 störf úr landi. Það var búið að byggja upp þekkingu á lyfjaframleiðslu og þróun á Íslandi, sem tók meira en 20 ár. Það væri mikil synd fyrir landið að missa þessa þekkingu úr landinu,“ segir hann.

Ekki náðist í fulltrúa Actavis við vinnslu þessarar fréttar.