Nálægur strandveiðibátur kom mönnunum til bjargar

Einn maður fórst og þrír voru hætt komnir þegar dragnógabáturinn Jón Hákon BA-60, sem gerður er út frá Bíldudal, sökk skyndilega út af Rit, nærri Aðalvík, við norðanvert við Ísafjarðardjúp, snemma í morgun. 

Báturinn sem er stálbátur var þar í ágætu veðri og voru skipverjar að taka inn veiðarfærin þegar eitthvað gerðist skyndilega og sýnt þótti að báturinn sykki. Allt gerðist þetta svo hratt að skipverjum vannst ekki tími til að fara í flotgalla og lentu í sjónum eins og þeir stóðu.

Það var klukkan rúmlega sjö og hvarf báturinn þá af skjá sjálfvirku tilkynningarskyldunnar. Skömmu síðar sendi stjórnstöð Gæslunnar út tilmæli til skipa og báta á svæðinu um að svipast um eftir bátnum.

Nálægur strandveiðibátur kom mönnunum til bjargar

Það var svo hátt í klukkustund síðar að sjómaður á nálægum strandveiðibáti kom fyrstur á vettvang og komust mennirnir þar um borð og fundu brátt lík félaga síns. Hvergi sást björgunarbátur, sem á að blásast sjálfkrafa út ef hann fer á kaf í sjó og er talið að mennirnir hafi hafist við á kili Jóns Hákons þar til hann sökk.

Yfirbyggði hraðfiskibáturinn Sædís var skammt undan og vegna góðs aðbúnar þar um borð og hversu hraðskreið hún er, fóru skipverjarnir blautir og kaldir yfir í hana og komu til Bolungarvíkur um klukkan tíu.

Þaðan voru þeir fluttir í sjúkrabíl á sjúkrahúsið á Ísafirði til aðhlynningar en munu allir ná sér. Þar voru þeir enn fyrir stundu, en svo skýrist væntanlega við skýrslutökur í dag hvað olli slysinu.

Von er á tilkynningu frá lögreglunni á Vestfjörðum vegna málsins.