GAMMA hefur starfsemi í Lundúnum

Fjármálafyrirtækið GAMMA fékk í gær staðfestingu frá Fjármálaeftirlitinu þess efnis að því væri heimilt að hefja starfsemi í Bretlandi. Það hefur því stofnað skrifstofu í Lundúnum, nánar tiltekið að New Broad Street í fjármálahverfinu City of London.

Í tilkynningu frá GAMMA segir að við afléttingu gjaldeyrishafta muni fyrirtækið bjóða upp á sjóði sem fjárfesti eing0ngu erlendis, auk þess sem það verði áfram í samstarfi við sjóðastýringafyrirtækið PIMCO, líkt og undanfarin ár. Þá hafi verðbréfasjóðurinn Total Return Fund, sem er í rekstri hjá GAMMA, einnig fengið heimildir til að fjárfesta erlendis og að þær verði nýttar þegar höftum verði aflétt.

GAMMA var stofnað árið 2008 og stýrir í sjóðum eignum sem nema um 50 milljörðum króna. Hjá félaginu starfa rúmlega 20 starfsmenn. GAMMA Ráðgjöf hefur sinnt ráðgjafarverkefnum fyrir stjórnvöld, Alþingi, stofnanafjárfesta, stór fyrirtæki og sveitarfélög.