Innlent

Ekkert sem bendi til undirliggjandi vandamála né siðblindu

sunna karen sigurþórsdóttir skrifar
Konan mætti fyrir dóm í dag í fylgd lögregluvarða en hún hefur setið í gæsluvarðhaldi frá 14.febrúar.
Konan mætti fyrir dóm í dag í fylgd lögregluvarða en hún hefur setið í gæsluvarðhaldi frá 14.febrúar. vísir/sunna karen

Geðlæknir sem framkvæmdi sálfræðimat á konunni sem grunuð er um að hafa orðið sambýlismanni sínum að bana við Skúlaskeið í Hafnarfirði í febrúar sagði ekkert benda til þess að hún eigi við einhver geðræn vandamál að stríða. Hún sé heilsteypt, dugleg og samviskusöm kona. Þá hafi ekkert bent til siðblindu, eftir siðblindupróf sem konunni var gert að fara í.



Umræddur geðlæknir gaf skýrslu í máli ákæruvaldsins á hendur konunni í Héraðsdómi Reykjaness í dag. Hann sagði konuna tala fallega um sambýlismann sinn og taldi fullvíst að samband þeirra hafi verið mjög ástríkt. Hún hafi þó efast um sjálfa sig í sálfræðimatinu.



Telur sig ábyrga

„Mér fannst hennar frásögn út í gegn heilsteypt. Ég sá sorgarviðbrögð og hún varð oft meyr. Eins og ég skil þetta þá studdi hún hann og ég held hún hafi elskað þennan mann,“ sagði geðlæknirinn.



„En það sem er svolítið merkilegt er að ef ég skil þetta rétt þá hefur hún aldrei talið sig hafa gert þetta. Mér finnst eins og hún telji sig eiga sök á því sem gerðist og sé ábyrg fyrir dauða hans.“



Konan var því metin sakhæf en hún gæti átt yfir höfði sér allt að sextán ára fangelsisvist. Hún sagði fyrir dómi í dag að hún og sambýlismaður hennar hafi bæði verið mjög drukkin daginn örlagaríka og kvaðst því ekki vita hvað hefði átt sér stað á heimili þeirra.



Sjá einnig: Þreif blóðið af manninum og klæddi í ný föt áður en hún óskaði eftir aðstoð



Talið er að maðurinn hafi látist á milli klukkan tólf og fjórtán hinn 14. febrúar síðastliðinn en skömmu fyrir hádegi tók hann leigubíl í vínbúð í Hafnarfirði áður en þau fóru saman í matvöruverslun.

Konan neitar sök í málinu og hafnar jafnframt öllum bótakröfum.vísir/stefán

Bæði tvö í annarlegu ástandi

Leigubílstjórinn sem ók þeim gaf jafnframt skýrslu í málinu. Hann sagði engan vafa ríkja um að þau hefðu bæði verið í annarlegu ástandi þennan morgun, en áður en konan settist upp í leigubíl datt hún og sambýlismaður hennar hjálpaði henni á fætur. Þá sagði hann ekkert hafa bent til þess að eitthvað ósætti hafi verið á milli þeirra.



„Fréttirnar komu mér mjög á óvart. En ég skil ekki pólsku þannig að ég veit ekki hvað fór þeirra á milli, en allt í góðu eins og ég les það,“ sagði leigubílstjórinn.



Fyrir dómi sagðist konan hafa vaknað árla morguns og fengið sér tvo bjóra og hugsanlega eitt til tvö vodkastaup. Hún sagðist hafa lagt sig og svo fundið manninn látinn. Þá hafi hún hringt í dóttur sína sem kom henni til aðstoðar, en dóttirin neitaði að gefa skýrslu fyrir dómi í dag.



Konan neitaði sök í málinu og hafnaði jafnframt öllum bótakröfum. Móðir og faðir mannsins fara hvort um sig fram á þrjár milljónir króna í miskabætur. Aðalmeðferð í málinu lýkur á morgun, en dómari málsins ákvað, vegna afstöðu ákærðu, að hafa dóminn fjölskipaðan.


Tengdar fréttir

Mannslát í Hafnarfirði: Hin grunaða neitaði sök

Konan sem ákærð er fyrir að hafa banað sambýlismanni sínum á heimili þeirra við Skúlaskeið í Hafnafirði í febrúar neitaði í morgun sök við þingfestingu í Héraðsdómi Reykjaness.

Morð í sömu götu fyrir þremur árum

Skúlaskeið í Hafnarfirði var vettvangur morðs fyrir þremur árum. Kona er í haldi lögreglu grunuð um að hafa banað sambýlismanni sínum í sömu götu á laugardaginn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×