Nefndarmaður Pírata biður móður lögreglumanns afsökunar

Sævar Óli Helgason, 44 ára nefndarmaður Pírata í Reykjavík, sætir ákæru fyrir að hafa hótað að berja lögreglumann og móður hans í júlí í fyrra. Sævar Óli hefur áður hlotið fangelsisdóma fyrir ofbeldisbrot. Annars vegar fyrir að rassskella leikskólakennara og hins vegar bregða fæti fyrir Ólaf Helga Kjartansson, þáverandi sýslumann á Selfossi.

Málið var þingfest þann 29. maí síðastliðinn en Sævar Óli viðurkennir hótanir sínar í garði þeirra í opnu bréfi sem hann ritaði móður lögreglumannsins í gær. Hann stendur fastur á því að lögreglumaðurinn sé einn þeirra sem „umturnast við það að fara í lögreglubúning“ og sonur hennar eigi ekki heima innan lögreglunnar.

Hann stendur þó fastur á því að lögreglumaðurinn hafi farið langt yfir strikið, svo langt að Sævar sjálfur hafi þurft að efna til borgaralegrar handtöku lögreglumannsins. Í bréfinu til móðurinnar, þar sem Sævar lýsir atburðarásinni frá eigin bæjardyrum, segist hann hafa hringt í neyðarlínuna til að óska eftir aðstoð við handtökuna. Honum hafi verið misboðið.

Hefur hlotið marga dóma

„Þess vegna hótaði ég honum á móti með því að segjast myndi kaghýða þig, honum ásjáandi, fyrir að ala upp svona vitleysing einsog hann væri... Áður en ég myndi svo snúa mér að honum og traðka á andlitinu hans, innanfrá...Ég veit…!“

Lögreglumaðurinn hafi í kjölfarið snúið sig niður, þrátt fyrir mótmæli kollega síns á vakt. Fullyrðir Sævar að þessi samskipti hljóti öll að vera til á upptöku auk símtals hans við neyðarlínuna sem hann telur hjálpa hans málsstað.

Sævar Óli hlaut sex mánaða dóm fyrir hvort fyrrnefndra ofbeldisbrota sem áttu sér stað árin 2005 og 2006. Þá hlaut hann 30 daga skilorðsbundinn fangelsisdóm fyrir endurtekin húsbrot við Ráðherrabústaðinn við Tjarnargötu árið 2012.

Enginn annar fékkst með svo litlum fyrirvara

Halldór Auðar Svansson, borgarfulltrúi Pírata, segir við Stundina sem fjallaði um málið í gær að til greina komi að svipta Sævar Óla varanefndarsæti verði hann fundinn sekur af hótunum sínum í garð lögreglu. Halldór Auðar segir Sævar Óla hafa einu sinni setið fund fyrir hönd Pírata. Það hafi verið fundur hjá Faxaflóahafnarnefnd.

Athygli vakti þegar Sævari Óla var teflt fram sem umboðsmanni Pírata fyrir borgarstjórnarkosningarnar fyrir rúmu ári. Sagði Halldór Auðar við DV af því tilefni að hann væri meðvitaður um fortíð Sævars Óla.

„Málið er bara að það var enginn annar sem fékkst í þetta með þessum fyrirvara,“ sagði Halldór Auðar við DV. Sendu Píratar í kjölfarið út yfirlýsingu þar sem þeir lýstu yfir stuðningi við Sævar Óla. Hann væri breyttur maður og flokkurinn stoltur af að „hjálpa þessum tönix að rísa úr öskunni.“

Halldór Auðar nýtti tækifærið, líkt og fleiri félagar við opið bréf Sævars Óla frá í gær, og minnti á að Sævar Óli væri mikill öðlingur.

„Ég þekki hann mjög vel og þetta er fínasti maður. Þetta er mjög vinnusamur maður. Okkur var fullkunnugt um fortíð hans, en hann hefur unnið mjög samviskusamlega og launalaust fyrir okkur. Hann hefur tekið út sína skuld og er í raun að taka hana út áfram með stjórnmálastörfum,“ sagði Halldór Auðar við DV.

Rassskellti kennarann eins og mamma hafði kennt

Fyrsti dómurinn yfir Sævari Óla sem vakti athygli var sex mánaða fangelsisdómur fyrir að rassskella leikskólakennara uppi á bílhúddi árið 2005. Konan hafði lagt bíl við innkeyslu og taldi Sævar Óli hana hafa lagt ólöglega þannig að hann átti í vandræðum með að komast leiðar sinnar.

Benti Sævar Óli konunni á þetta en deildu þau um samskipti þeirra í kjölfarið. Óumdeilt er þó að að endingu brást Sævar Óli þannig við að hann skellti konunni á vélarhlíf bílsins og sló nokkrum sinnum þéttingsfast í rassinn eins og hann sagði mömmu sína hafa kennt sér.

Fjórir af mánuðum sex voru skilorðsbundnir í þessu sérstaka máli sem Vísir fjallaði um á sínum tíma.

Hélt á fund sýslumanns

Ári síðar hlaut Sævar Óli annan sex mánaða dóm fyrir að grípa í öxl Ólafs Helga Kjartanssonar, þáverandi sýslumanns á Selfossi, og bregða fyrir hann fæti. Sævar Óli bar því við að hann hefði gripið í öxl Ólafs Helga þar sem sá síðarnefndi vildi ekki veita skýrslu hans viðtöku. Atvikið átti sér stað í Héraðsdómi Suðurlands.

Sævar Óli hafði farið á lögreglustöðina á Selfossi og ætlað að tilkynna mál. Vildi hann ná tali af sýslumanni en fékk þau svör að hann væri ekki á svæðinu heldur í dómssal. Hélt hann á fund Ólafs Helga þar sem bauð honum viðtalstíma daginn eftir. Þótti Sævari Óla frekari samskipti þeirra til marks um hroka. Viðurkenndi Sævar Óli að hafa gripið í öxl sýslumanns en neitaði að hafa brugðið fyrir hann fæti.

Dóminn í heild sinni má lesa hér.

Hlaut Sævar Óli sem fyrr sex mánaða óskilorðsbundin dóm sem var hans þriðji dómur fyrir ofbeldisbrot á fjórum árum. Hann hafði fengið fjögurra mánaða skilorðsbundinn fangelsisdóm árið 2003. Þá fékk Sævar Óli einnig skilorðsbundinn 30 daga fangelsisdóm árið 2013 fyrir endurtekin innbrot í Ráðherrabústaðinn við Tjarnargötu.

Dóminn í því máli má lesa hér,

Segir misheppnað uppeldi ekki móðurinni að kenna

Sævar Óli segist í fyrrnefndu bréfi sem hann ritar til móður lögreglumannsins í gær biðja hana afsökunar á að hafa blandað henni inn í deilur hennar og sonar hennar.

„Það var virkilega ljótt og slæmt af mér að gera, því auðvitað á ekki að kenna þér um þó svona illa hafi ræst úr uppeldinu á honum syni þínum…,“ segir Sævar Óli sem sótti um hæli í Danmörku árið 2011 vegna þess sem hann kallar einelti íslenskra stjórnvalda gegn sér.

Hann gefur henni loforð um að láta hana algjörlega í friði.

„Mín er algjör skömmin fyrir að hafa blandað þér í þetta mál…!“

Bréfið í heild sinni má lesa hér að neðan.

Opið bréf til móður lögregluþjónsins sem ég hótaði...! Ég ætla að biðja þig innilegrar afsökunar á því að hafa sagt...

Posted by Saevar Oli Helgason on Saturday, June 6, 2015