Illugi fékk óútskýrt lán frá Orku Energy

Illugi Gunnarsson, menntamálaráðherra, fékk lán og laun frá fyrirtækinu Orku Energy árið 2011 sem nema allt að tíu milljónum króna. Stundin greinir frá þessu.

Samskipti Illuga við Orku Energy vöktu athygli í apríl en þá sagðist Illugi engra fjárhagslegra hagsmuna eiga að gæta í tengslum við starfsemi Orku Energy í samtali við Fréttablaðið.

Sjá einnig: Vilja svör um tengslin við Orku Energy

Síðar kom í ljós að Illugi leigir húsið sitt af Hauki Harðarsyni, stjórnarformanni Orku Energy, en Haukur hafði keypt íbúðina af menntamálaráðherra í lok mái árið 2013. Haukur aðstoðaði Illuga þar með úr miklum fjárhagsvandræðum.

Sjá einnig: Illugi seldi eigin félagi íbúðina

Samkvæmt frétt Stundarinnar hefur ekki tekist að ná í Illuga til þess að fá frekari skýringar á láninu og hann hefur ekki svarað fyrirspurnum blaðamanns í tölvupósti. Stundin segir heimildir sínar herma að greiðslur Orku Energy til Illuga hafi numið um tíu milljónum króna. Illugi hefur fengið þrettán tölvupósta og fjölda spurninga sem útlistaðar eru í frétt  Stundarinnar en hvorki svarað bréfinu né spurningunum.

Vísir hefur einnig reynt að ná tali af Illuga margoft og sent aðstoðarmanni hans spurningar varðandi fjárhagsleg tengsl hans við Hauk. Þeim hefur heldur ekki verið svarað.