Illugi Gunnarsson, mennta- og menningarmálaráðherra, seldi eigin eignarhaldsfélagi íbúð sína og eiginkonu sinnar við Ránargötu í Reykjavík í lok maí árið 2013. Haukur Harðarson, stjórnarformaður Orku Energy, keypti eignarhaldsfélagið og þar með fasteignina í desember sama ár. Það var eftir að Illugi hafði verið viðstaddur undirritun samnings á milli Orku Energy og kínverskra stjórnvalda og eftir að hann hafði þegið laun frá félaginu.

Átti ekki í viðskiptum við Hauk í maí

Af svörum Illuga við fyrirspurn fréttastofu í gær mátti skilja að Illugi hafi selt íbúðina til Hauks í maí árið 2013, áður en Illugi tók sæti sem mennta- og menningarmálaráðherra en eftir að nýtt þing var kosið. Á þeim tíma var félagið sem heldur utan um eignina, OG Capital, hins vegar enn í eigu Illuga.



Samkvæmt gögnum frá ársreikningaskrá undirritaði Haukur umboð til Harðar Harðarsonar um að skrifa undir kaupsamning vegna OG Capital 29. desember árið 2013. Félagið var svo keypt daginn eftir fyrir 500 þúsund krónur, að því er fram kemur í umboðinu til Harðar. Sama dag sagði Illugi og Brynhildur Einarsdóttir, eiginkona hans, sig úr stjórn fyrirtækisins en þar höfðu þau setið, annað sem formaður og hitt sem varamaður, frá því árið 2010.

Afsalið ekki undirritað fyrr en 2014

Í fasteignaskrá ríkisins segir að afhendingardagur fasteignarinnar við Ránargötu sé 31. desember árið 2013, það er daginn eftir að gengið hafði verið frá kaupum Hauks á OG Capital og úrsögn Illuga úr stjórn félagsins. Þetta kemur fram í afsali eignarinnar sem undirritað var 23. júní árið 2014, tæpum sjö mánuðum eftir að afhending fasteignarinnar hafði farið fram og rúmu ári eftir að Illugi segist hafa gert kaupsamning vegna íbúðarinnar. 

Í afsalinu kemur einnig fram að félagið yfirtaki skuldir sem hvíla á eigninni. Það er 25,5 milljóna króna lán og annað 8,5 milljóna lán. Einnig yfirtók félagið 21 milljóna króna tryggingabréf sem hvíldi á þriðja veðrétti íbúðarinnar. Samkvæmt Illuga voru engar skuldir á bak við það tryggingarbréf. 

Skjölin ekki þinglýst

Eina skjalið sem hefur verið þinglýst vegna viðskiptanna er afsalið frá 2014. Kaupsamningurinn sem Illugi vísar til í svari sínu við fyrirspurn fréttastofu í gær var ekki þinglýstur. Þá hefur engum leigusamningi verið þinglýst hjá sýslumanni vegna íbúðarinnar. Opinber gögn eru því að mörgu leiti takmörkuð er varða viðskiptin en auk afsalsins eru áður nefnd gögn úr fyrirtækjaskrá aðgengileg.

Var spurður hvort Haukur væri viðskiptafélagi

Illugi upplýsti um málið að eigin frumkvæði í viðtali við RÚV. Það var eftir að hann hafði fengið sendar spurningar frá blaðamanni Stundarinnar þar sem spurt var út í viðskipti hans við OG Capital. Samkvæmt Stundinni svaraði Illugi ekki öllum spurningum fréttastofunnar. Hann óskaði eftir að fá að koma í viðtal við RÚV þar sem hann upplýsti að hann hafi selt stjórnarformanni og einum eiganda Orku Energy íbúðina sína vegna fjárhagserfiðleika.

DV hafði þá spurt beint út í tengsl Illuga við Hauk. Í svörum við skriflegum spurningum blaðsins sem bárust 20. apríl sagðist Illugi ekki hafa fjárhagsleg tengsl við Hauk. Sá hann ekki ástæðu til að greina frá því að Haukur hafi aðstoðað hann við að leysa úr miklum fjárhagsvandræðum sínum með því að yfirtaka íbúðina hans og eignarhaldsfélagið OG Capital. Það gerði hann hins vegar fimm dögum síðar í áðurnefndu viðtali við RÚV.

Skuldsett fyrir 57 milljónir

Samkvæmt ársreikningi OG Capital fyrir árið 2013, þar sem Haukur er skráður eigandi að öllu útgefnu hlutafé í félaginu, eru ekki teljandi tekjur færðar til bókar. Í raun virðist eina starfsemi félagsins hafa verið kaup á íbúð Illuga og eiginkonu hans. Skuldir félagsins jukust um 57 milljónir króna á árinu en samkvæmt því sem Illugi sagði í yfirlýsingu á Facebook var íbúðin seld á 53,5 milljónir.

Vísir óskaði í morgun eftir viðtali við Illuga vegna málsins en þegar þetta er skrifað hefur ekkert svar borist frá aðstoðarmanni ráðherrans vegna þessa.