Skeljagrandabróðir eldri þarf að víkja úr dómssal: Rafstuð í kynfæri og smjörsýra í munn

Kristján Markús Sívarsson og tveir nítján ára drengir þurfa að víkja úr dómssal á meðan brotaþoli á nítjánda ári gefur skýrslu. Hæstriréttur staðfestir úrskurð Héraðsdóms Reykjaness að þessu leyti en þremenningarnir eru grunaðir um frelsissviptingu, ólögmæta nauðung, sérstaklega hættulega líkamsárás og tilraun til fjárkúgunar í ágúst 2014.

Meint árás átti sér stað í húsi í Vogum á Vatnsleysuströnd. Eru mennirnir meðal annars sakaðir um að hafa gefið átján ára piltinum rafstuð í kynfæri, stungið hann í lærið með óhreinni sprautunál og neytt hann til að drekka smjörsýru. Vísir fjallaði ítarlega um ákæruna á dögunum en þremenningarnir neita sök í málinu. Óttaðist brotaþoli að hann myndi láta lífið á meðan á árásinni stóð að því er fram kemur í máli réttargæslumanns.

Í úrskurði héraðsdóms kemur fram að fyrir liggi vottorð frá sálfræðingi þar sem fram kemur að pilturinn hafi verið haldinn mikilli streitu og skelfingu frá atburðinum. Hann sé haldinn alvarlegri áfallastreituröskun. Taldi dómurinn að nærvera Kristján og hinna tveggja gæti orðið vitninu sérstaklega erfið og hafa mögulega áhrif á framburð hans. Hæstiréttur var sama sinnis.

Fimm ákærur gegn Kristjáni

Fimm ákærur gagnvart Kristjáni Markúsi hafa verið sameinaðar í einu og sama málinu sem rekið verður í héraði. Í einu þeirra er Kristján ásamt Ríkharði Ríkharðssyni og Marteini Jóhannssyni sakaður um að hafa í febrúar í fyrra veist að manni í íbúð hans. Eiga þeir að hafa meðal annars tekið hann kverkataki, slegið með leikjatölvu í andlitið og stungið með skærum í upphaldeggina og axlirnar.

Þá eru þeir ákærðir fyrir að hafa svipt manninn frelsi sínu í eina og hálfa klukkustund á meðan árásinni átti sér stað. Allir hafa þeir neitað sök í málinu fyrir dómi en nánar má lesa um ákæruna hér.

Lögmaður mannsins bar því við að að vitnið væri hrætt við ákærðu og fyrir lægi vottorð frá í febrúar í fyrra sem sýni mjög sterk einkenni streituröskunar mannsins í kjölfar árársarinnar. Vottorð frá réttargæslumanni mannsins barst eftir að boðað var til uppkvaðningar úrskurðar. Dómari taldi það of seint fram komið og að ekki hefði verið sýnt fram á að nærvera Kristjáns, Ríkharðs og Marteins gæti orðið vitninu sérstaklega til íþyngingar og haft áhrif á framburð hans. Hafnaði dómurinn því beiðninni og staðfesti Hæstiréttur úrskurðinn.

Dóm Hæstaréttar má lesa í heild sinni hér.