Ásbjörn áfram í Firðinum

Ásbjörn Friðriksson skrifaði í gær undir nýjan þriggja ára samning við handknattleiksdeild FH. Þetta kemur fram á heimasíðu FH.

Ásbjörn, sem er 27 ára, hefur verið í lykilhlutverki hjá FH undanfarin ár en hann gekk til liðs við Hafnarfjarðarliðið frá Akureyri fyrir tímabilið 2008-09.

Ásbjörn varð Íslandsmeistari með FH 2011 og gekk að tímabilinu loknu til liðs við Alingsås í Svíþjóð. Hann sneri svo aftur í Kaplakrikann haustið 2012.

Ásbjörn skoraði 121 mark fyrir FH í vetur en liðið endaði í 4. sæti Olís-deildarinnar og féll svo út fyrir Haukum í fyrstu umferð úrslitakeppninnar.

Ásbjörn hefur leikið einn A-landsleik.