Chelsea Manning fer í hormónameðferð

Chelsea Manning, sem dæmd var fyrir að leka gögnum til Wikileaks, mun fara í hormónameðferð vegna kynjaskiptingar. Meðferðin mun gera Manning kleyft að verða kona að fullu. Yfirmaður fangelsisins sem hún er í samþykkti það fyrr í mánuðinum.

Varnarmálaráðuneyti Bandaríkjanna segir að ákvörðunin hafi verið tekin eftir að í ljós kom að hætt væri við því að Manning myndi gelda sig, eða fremja sjálfsmorð.

Á vef Sky News kemur fram að þessi aðgerð sé framkvæmd af og til á föngum en að Mannig sé fyrsti hermaðurinn sem fari í hana.

Manning var dæmd fyrir njósnir í ágúst 2013 eftir að hafa lekið meira en 700 þúsund skjölum til Wikileaks. Hún var dæmd í 35 ára fangelsi. Í apríl í fyrra breytti hún nafni sínu úr Bradley Manning í Chelsea Manning.