Vill upplýsingar um kostnað við ferðir forseta Íslands

Svandís Svavarsdóttir, þingmaður Vinstri grænna, hefur óskað eftir því að forsætisráðherra svari fyrirspurn hennar um ferðir Ólafs Ragnars Grímssonar, forseta Íslands.

Fyrirspurn Svandísar er í níu liðum en í fyrsta lagi vill hún vita hversu marga daga forseti Íslands hefur verið erlendis á þessu kjörtímabili frá innsetningu 1. ágúst 2012 til loka ársins 2014.

Þá vill hún vita hversu mikla dagpeninga forsetaembættið hefur greitt forseta og embættismönnum vegna ferðanna, tilgreint eftir árum og tilefnum.

Hún vill einnig vita hvert forsetinn hefur farið í opinberum erindgjörðum og vill að hver ferð sé tilgreind sérstaklega, svo og boðsaðili þegar um þá er að ræða.

Vill líka upplýsingar um kostnað maka

Þá spyr hún hvað þessar embættisferðir forseta Íslands og embættismanna kostuðu og óskar eftir sundurliðuðum kostnaði eftir ferðatilefnum og ferðalögum.

Svandís spyr hvort utanríkisráðuneytið hafi verið með í ráðum um embættisferðirnar og þá hvaða ferðir og hverjar ekki. Spyr hún hvort bréfleg samskipti liggi fyrir um ferðirnar milli forsetaembættisins og utanríkisráðuneytisins. Hún fer einnig fram á að vita hve mikill kostnaður hefur fallið á forsetaembættið vegna ferða maka forseta á þessu tímbili.

Einnig vill hún að tölur liggi fyrir um heildarkostnað ríkissjóðs vegna þessara ferða í greiðslum til handhafa forsetavalds.

Að endingu fer hún fram á yfirlit yfir hversu marga heila daga forseti Íslands hefur verið á Íslandi á framangreindu tímabili, sundurliðað eftir árum.

Forsetinn í Abu Dhabi

Ólafur Ragnar flutti í gær ávarp við opnun nýrrar norrænnar skrifstofu á Masdar-svæðinu í Abu Dhabi, höfuðborg Sameinuðu arabísku furstadæmana. Á vef embættis forseta Íslands kemur fram að skrifstofunni sé ætlað að veita norrænum fyrirtækjum aðstöðu og liðsinni við að kynna nýjungar sínar, tækni og framleiðslu í Mið-Austurlöndum og á starfræksla hennar að nýtast við kynningu á jarðhitatækni Íslendinga.

Forsetinn hefur annars haft í nógu að snúast í Abu Dhabi síðustu daga vegna Heimsþings hreinnar orku en á sunnudag átti hann fund með fulltrúum Reykjavík Geothermal og stjórnvalda í Abu Dhabi um mögulega nýtingu lághitasvæða í borginni og annarstaðar í Mið-Austurlöndum til loftkælingar.

Átti fund með fulltrúa kínversks fjárfestingarsjóðs

Sama dag átti Ólafur Ragnar fund í tengslum við Heimsþing hreinnar orku, sem haldið er í Abu Dhabi, með Hauki Harðarsyni, stjórnanda Orku Energy, og Fanglu Wang, framkvæmdastjóra kínverska fjárfestingarsjóðsins CITTIC Capital um þróun hitaveituverkefna í Kína.

Á mánudag stjórnaði forsetinn blaðamannafundi þar sem handhafar Zayed orkuverðlaunanna sátu fyrir svörum en fundarinn var haldinn í kjölfar verðlaunaathafnarinnar í Abu Dhabi.

Í kjölfarið átti Ólafur Ragnar fund með Al Gore, fyrrum varaforseta Bandaríkjanna og Nóbelsverðlaunahafa, sem tók við sérstökum heiðursverðlaunum Zayed orkuverðlaunanna.

Hann átti einnig sama dag fund með Ségolène Royal, orku- og umhverfisráðherra Frakklands, efndi til í Abu Dhabi þar sem rætt var um myndun alþjóðlegs bandalags um jarðhita, Global Geothermal Alliance.