Gagnrýna háa verðskrá ferðaþjónustu fatlaðra í Reykjavík

Átak, félag fólks með þroskahömlun, lýsir undrun sinni á nýrri gjaldskrá á ferðaþjónustu fatlaðs fólks í Reykjavík, í ályktun sem það hefur sent frá sér.

Félagið telur að vegna hárrar gjaldskrár muni sumir félagsmenn ekki geta tekið þátt í störfum Átaks og spyrja hvort að verðið sé til þess fallið að auka félagslega þátttöku fatlaðs fólks.

Þá gagnrýnir félagið jafnfram bæklinga og upplýsingagjöf til notenda þjónustunnar. Þeir séu hvorki á aðgengilegu formi né auðskildir og þar af leiðandi óaðgengilegir þeim sem nota þjónustuna.

Átak óskar eftir því að Strætó bæti úr þessu en ályktun félagsins má sjá í heild sinni hér að neðan:

Átak félag fólks með þroskahömlun lýsir undrun sinni á nýrri gjaldskrá ferðaþjónustu fatlaðs fólks í Reykjavík. Gjaldskráin er þannig að sumir félagar Átaks, geta ekki tekið þátt í félagsstörfum vegna hárrar gjaldskrár ferðaþjónustunnar.

Félagsmaður sem notar strætó og er með árskort sem hann greiðir 70.900 fyrir á ári á meðan annar sem notfærir sér ferðaþjónustuna greiðir kr. 1.100, fyrir hverja aukaferð hjá ferðaþjónustunni. Fyrir þá sem sitja í stjórn Átaks og sækja reglubundna stjórnarfundi og viðburði sem Átak stendur fyrir gæti það kostað kr. 57.200 kr. á ári. Sá sem notar strætó kemst eins oft og hann vill á hvað sem hann vill.

Hvað er sanngjarnt við þetta? Mun þetta auka félagslegaþátttöku fatlaðs fólks?

Átak telur að þetta muni leiða til þess að félagsmenn muni frekar neita sér um að sækja viðburði og taka þátt í starfi félagsins vegna fjárhags.

Í samningi Sameinuðu þjóðanna um réttindi fatlaðs fólks segir í 20. gr.:

,,Passa þarf að sjálf-stæði fatlaðs fólks sé tryggt og að það geti farið allra sinna ferða," og ,,Góð ferða-þjónusta og aðstoð starfsfólks fyrir fatlaða á að vera aðgengileg og ódýr."

Einnig gagnrýnir Átak bæklinga og upplýsingagjöf til notenda þjónustunnar. Þeir eru ekki á aðgengilegu formi né auðskyldir og því óaðgengilegir þeim sem nota þjónustuna.

Óskað er eftir því að Strætó bæti úr þessu og komi upplýsingum á auðskilinn texta og myndræna framsetningu þannig upplýsingar séu aðgengilegar fyrir alla.

Við teljum að fatlað fólk eigi rétt á að ferðast eins oft og það vill eins og allir aðrir, það er grundvöllur sjálfstæðis okkar í samfélaginu.