Lögreglan bíður eftir gögnum frá útlöndum vegna HIV-málsins

Rannsókn lögreglunnar á máli hælisleitanda frá Nígeríu sem grunaður er um að hafa smitað konur vísvitandi af HIV er langt komin að sögn Friðriks Smára Björgvinssonar, yfirlögregluþjóns hjá lögreglunni á höfuðborgarsvæðinu.

Hann segir þó erfitt að segja til um hvenær rannsókn ljúki því það velti meðal annars á því hvenær gögn berist frá útlöndum. Um hvaða gögn er nákvæmlega að ræða vill Friðrik Smári ekkert segja.

Þá vill hann hvorki gefa upp hversu marga lögreglan hefur yfirheyrt í tengslum við málið né hversu margar konur smituðust af HIV vegna mannsins.

Maðurinn var handtekinn í júlí og í kjölfarið úrskurðaður í fjögurra vikna gæsluvarðhald. Þegar það rann út í ágúst var hann svo úrskurðaður í farbann til 16. september. Rannsókn lögreglu, sem er í samstarfi við sóttvarnalækni, snýr meðal annars að því að upplýsa hvort maðurinn hafi vitað að hann væri smitaður af veirunni og þannig vísvitandi smitað konur. Maðurinn hefur ávallt haldið fram sakleysi sínu og kveðst ekki hafa vitað að hann væri með HIV.

Eftir því sem Vísir kemst næst eru á annan tug kvenna á lista yfir þá sem verið er að reyna að hafa samband við vegna málsins en samkvæmt heimildum Vísis er að minnsta kosti ein kona smituð.