Myndavél mun skoða flakið

Rannsókn á orsökum þess að bátnum Jóni Hákoni BA-60 hvolfdi skammt frá Aðalvík á Hornströndum er á frumstigi. Þetta segir Jón Arelíus Ingólfsson, rannsóknastjóri rannsóknarnefndar samgönguslysa, í samtali við Vísi. Einn maður fórst í slysinu en þremur var bjargað.

„Við erum að safna saman gögnum sem stendur. Við tókum skýrslu af skipstjóranum í dag og ræðum við aðra úr áhöfninni á næstunni,“ segir Jón Arelíus. Að auki er stefnt að því að fara með myndavélar að bátnum og skoða hann á þann veg.

Aðspurður um hvenær megi búast við niðurstöðum í fyrsta lagi segir Jón að það sé erfitt að segja um það. „Það veltur alfarið á því hve djúpt þarf að kafa í málið. Ef það kemur eitthvað í ljós sem okkur finnst að þurfi að athuga þá gerum við það gaumgæfilega og skilum engu frá okkur fyrr en allt er orðið ljóst.“