Þak losnaði af húsi í Grindavík

Björgunarsveitir Slysavarnafélagsins Landsbjargar hafa verið kallaðar út vegna foks á nokkrum stöðum í nótt og í morgun. Rétt eftir miðnætti barst tilkynning um að þakkantur væri að fjúka af húsi í Funalind, en hann var á fimm hæða húsi.

Því var óskað eftir aðstoð frá körfubíl frá Slökkviliði höfuðborgarsvæðisins.

Samkvæmt tilkynningu frá Landsbjörgu losnaði þak af húsi í Grindavík og sólhús fauk í Reykjanesbæ. Á Þingeyri fauk þak af fjósi og á níunda tímanum fóru þakplötur af stað á Bíldudal og grindverk fauk á Sauðárkróki.