Malín Brand kveðst hafa dregist inn í fjárkúgunina

Reyfarakennd atburðarás átti sér stað í hádeginu á föstudag þegar sérsveit ríkislögreglustjóra sat fyrir systrunum Hlín Einarsdóttur og Malín Brand sunnan Vallahverfis í Hafnarfirði.

Var það gert í kjölfar þess að bréf merkt Önnu Sigurlaugu Pálsdóttur, eiginkonu Sigmundar Davíðs Gunnlaugssonar forsætisráðherra, barst á heimili þeirra hjóna í Ystaseli. Bréfið var sent með pósti og fjölskyldan varð þess vör síðdegis á fimmtudag og í kjölfarið var hringt í lögreglu.

Í bréfinu var hótun um að upplýst yrði um fjárhagstengsl Sigmundar Davíðs og Björns Inga Hrafnssonar, eiganda Vefpressunnar ehf. Samkvæmt heimildum Fréttablaðsins var bréfið að hluta handskrifað og að hluta til samsett úr stafaúrklippum. 

Sjá einnig: Malín og Hlín játa að hafa reynt að kúga fé út úr forsætisráðherra

Systurnar játuðu að eiga aðild að málinu en Malín sagði í samtali við Vísi í gær að hún hefði ekki sent bréfið heldur farið með systur sinni, þar sem hún taldi ekki líklegt að nokkur myndi taka þetta alvarlega. „Kjarni málsins er að þarna blandast ég inn í atburðarás sem ég hvorki skipulagði né tengdist á nokkurn hátt nema fjölskylduböndum,“ sagði Malín. 

Bréfinu fylgdu leiðbeiningar um hvernig koma ætti peningunum til skila en þar var fyrirskipað að þeim yrði komið fyrir við Krísuvíkurveg sunnan Vallahverfis. Sérsveit ríkislögreglustjóra handtók systurnar þegar þær voru að nálgast fjármunina.

Systurnar voru færðar til yfirheyrslu hjá lögreglu þar sem þær játuðu aðild að málinu en yfirheyrslan stóð í sólarhring.

Sjá einnig: Malín Brand: Ætlaði að keyra í burtu er ljóst var í hvað stefndi

Húsleitir voru gerðar í framhaldinu á heimili þeirra beggja, annars vegar á heimili Malínar á Selfossi og hins vegar á heimili Hlínar við Kristnibraut í Grafarholti þar sem sönnunargagna var leitað. Símar og tölvur í þeirra eigu voru gerð upptæk. Þeim var sleppt að lokinni yfirheyrslu og málið telst að mestu upplýst. Ríkissaksóknari tekur ákvörðun um næstu skref.

Ekki er vitað hvort upplýsingar sem talað er um í bréfinu eru til en Hlín var sambýliskona Björns Inga frá árinu 2011 til ársins 2014. Hún var ritstjóri Bleikt.is, vefsíðu í eigu Björns Inga. Malín hefur starfað sem blaðamaður á Morgunblaðinu en er komin í leyfi frá störfum til 1. ágúst næstkomandi.

Í yfirlýsingu frá forsætisráðherra kemur fram að upplýsingar í bréfinu byggðust á getgátum og sögusögnum. Hann segist hvorki hafa fjárhagsleg tengsl við Björn Inga Hrafnsson né hafa komið að kaupum á DV.

Sjá einnig: Fjölmiðlanefnd skoðaði gögn tengd DV í ljósi frétta um fjárkúgun

Björn Ingi Hrafnsson neitaði því í samtali við blaðamann að Sigmundur eða félag í hans eigu ætti hlut í DV eða að hann hefði lánað fyrir kaupum á DV.

„Forsætisráðherra fjármagnaði ekki kaup Pressunnar á DV. Hann á ekki hlut í blaðinu. Að öðru leyti óska ég eftir því að tekið sé tillit til þess að hér er mannlegur harmleikur á ferðinni og að aðgát skuli höfð í nærveru sálar,“ skrifaði Björn Ingi í stöðuuppfærslu á Facebook.

Verði systurnar fundnar sekar um fjárkúgun gætu þær átt yfir höfði sér sex ára fangelsi en fjárkúgun er brot á 251. grein almennra hegningarlaga.

Farið var ítarlega yfir atburðarásina í málinu í Íslandi í dag í gær. Umfjöllunina má sjá hér að neðan.