Maður þarf bara góðan stól og hugmyndaauðgi

„Ég ætla nú bara að vera voðalega rólegur og njóta þess að vera með fjölskyldunni minni, ekkert stórt í gangi þannig,“ segir Gunnar Þórðarson tónlistarmaður, en hann fagnar sjötugsafmæli sínu á sunnudaginn.

Gunnar er fæddur á Hólmavík þann 4. janúar 1945 og átta ára gamall fluttist hann til Keflavíkur. Þar hófst farsæll tónlistarferill hans með hljómsveitinni Hljómum, einni vinsælustu hljómsveit allra tíma á Íslandi, en áður hafði hann spilað á trommur í ónefndri hljómsveit Erlings Björnssonar. „Þetta byrjaði nú þannig að við vorum bara að stæla Bítlana. Þegar ég heyrði síðan að þeir semdu sín eigin lög, hugsaði ég að fyrst þeir gerðu það, gæti ég allt eins gert það líka,“ segir Gunnar.

Árið 1967 fluttist hann til Reykjavíkur og árið 1969 sameinuðust Hljómar hljómsveitinni Flowers og stofnuðu Trúbrot, sem starfaði allt til ársins 1973. Gunnar hefur í gegnum árin unnið með öllum helstu tónlistarmönnum landsins og spilaði hann meðal annars á fyrstu sólóplötu Björgvins Halldórssonar árið 1970.

En hvað stendur upp úr þegar litið er yfir tónlistarferilinn? „Ég verð nú að segja að það er þegar ég var í Hljómum og Trúbrot. Einnig var ég hljómsveitarstjóri á Broadway í tuttugu ár sem er eftirminnilegt. Svo auðvitað óperan Ragnheiður, sem ég samdi með Friðriki Erlingssyni. Það var nú aldrei á stefnuskránni að gera óperu, ekki óraði mig fyrir því þegar ég var að byrja,“ segir hann.

Í lok mars verða haldnir afmælistónleikar í Hörpunni. Þar verða hans þekktustu lög flutt af landsliði tónlistarmanna ásamt því sem afmælisbarnið sjálft mun stíga á svið. „Þetta er allt í vinnslu. Dúettinn Þú og ég kemur fram, Björgvin Halldórsson og fleiri góðir. Svo verður tekið eitthvað úr óperunni Ragnheiði,“ segir Gunnar.

Hann segist alls ekki vera hættur að semja og er að vinna í nýrri óperu ásamt Friðriki Erlingssyni. „Maður er ekki alveg búinn, ég held bara áfram eins lengi og ég get. Maður sem býr til tónlist þarf bara góðan stól og hugmyndaauðgi,“ bætir Gunnar við.