Nyegaard: Guðmundur á eftir að höndla pressuna

Íslandsvinurinn Bent Nyegaard er sérfræðingur TV2 sjónvarpsstöðvarinnar.  Hann þjálfaði bæði Fram og ÍR á sínum tíma.  Hann segir pressuna á Guðmund Guðmundsson gríðarlega mikla.  Íslenska landsliðið er í hópi 8-10 bestu í heimi að hans mati.

„Það hefur verið mikil umræða um dómgæsluna.  Þannig voru fáir brottrekstrar í leik Dana og Rússa og maður veltir því fyrir sér hvort leikmenn séu farnir að laga sig að dómgæslunni. Ég veit ekki hvort þetta er gott fyrir íþróttina. Ég vil að menn fái að takast á án þess að vera grófir," segir Nyegaard.

Er handboltinn eitthvað að breytast, er hann betri eða verri á þessu móti?

„Ég hef fylgst vel með D-riðlinum þar sem Danir spila. Margir leikir þar hafa verið góðir t.d. leikur Dana og Þjóðverja sem var frábær. Pólverjar og Argentínumenn eru sterkir. Við teljum að Evrópa eigi bestu liðin í karlaflokki en svo sjáum við lið eins og Argentínu og Eygptaland.  Það verður fróðlegt að sjá hvort handboltalið utan Evrópu eru að verða sterkari."

Gæti það orðið erfiðara fyrir lið eins og það íslenska að komast á heimsmeistaramót í framtíðinni?

„Ég veit það ekki því ég tel að Íslendingar séu í hópi 8-10 bestu liðanna í dag.  En Suður Ameríkuliðin sækja á og ég er einnig hissa á þvi hvað Egyptar eru sterkir."

En hvað segir Nygegaard um frammistöðu íslenska liðsins, kemur hún honum á óvart?

„Mjög á óvart.  Ég var hissa á stórum ósigrum gegn Svíum og Tékkum og hissa á jafntefli við Frakka. Það eru alltof miklar sveiflur í leik liðsins.  Við Danir óttumst alltaf Íslendinga því þeir spila alltaf vel gegn okkur.  Við sáum það í æfingamótinu fyrr í þessum mánuði.  Þeir eru mótherjar sem við viljum ekki mæta en það bendir margt til þess að svo verði“.

Hvað með pressuna á Guðmund Guðmundsson.

„Hún er gríðarleg. Við höfum staðið okkur vel á fjórum síðustu mótum og þegar við gerum jafntefli við Argentínu og Þýskaland, sem við teljum að við séum betri og þegar þú spilar vel í fyrri hálfleik en missir taktinn í þeim seinni, þá er pressan mikil.  Ég held að Guðmundur eigi eftir að höndla pressuna. En þetta er ný áskorun fyrir hann. Hér er krafan um að komast úr skugganum á hinum sigursæla Ulrik Wilbek.  Hann á því mikið verk fyrir höndum."

Ekki missa af neinu sem gerist á HM. Fylgdu Vísi á Twitter, Facebook og Snapchat (notendanafn: sport365).