Haukur Heiðar lagði upp sigurmark AIK í uppbótartíma

Haukur Heiðar Hauksson lagði upp sigurmark AIK í uppbótartíma gegn Gefle í sænsku úrvalsdeildinni í knattspyrnu í dag, en markið kom í uppbótartíma. Lokatölur 2-1 sigur AIK sem er í öðru sæti deildarinnar.

Nils-Eric Johansson kom AIK yfir á 41. mínútu og þannig stóðu leikar í hálfleik. Gefle jafnaði svo metin á 75. mínútu, en þar var að verki Dioh Williams.

Leiknum virtist vera að ljúka með 1-1 jafntefli, en Johan Blomberg skoraði svo sigurmarkið í uppbótartíma eftir undirbúning frá Hauki Heiðari Haukssyni. Lokatölur 2-1.

Með sigrinum skaust AIK upp í annað sæti deildarinnar, en Gautaborg er í fyrsta sæti deildarinnar eftir 1-0 sigur á Åtvidaberg.

Sigurmarkið þar kom einnig í uppbótartíma, en það gerði Mikael Boman eftir sendingu frá Emil Salomonsson. Hjálmar Jónsson spilaði allan tímann í vörn Gautaborgar.

Gautaborg er með tveggja stiga forystu á toppi deildarinnar, en Elfsborg getur jafnað þá að stigum með sigri á Kalmar síðar í dag.